क्रान्ति केन्द्र सम्वाददाता
राजविराज—यस वर्ष खेतीपातीको समयमा रासायनिक मलको अभाव नहुने प्रधानमन्त्री केपी शर्मा ओलीले दावी गरेका छन्। उनले आइतबार आफ्नो सामाजिक सञ्जालमार्फत हालको मौज्दात र आउने क्रममा रहेको मलको विवरण सार्वजनिक गर्दै किसानलाई ढुक्क भएर खेती गर्न आग्रह गरेका हुन्।
‘कृषि मन्त्रालयको तथ्याङ्क अनुसार हाल तत्कालका लागि २८ हजार ८२४ मेट्रिक टन मल मौज्दात छ भने १ लाख ४० हजार ५०४ मेट्रिक टन मल आउने क्रममा रहेको छ,’ उनले लेखेका छन्।
हाल कृषि सामग्री कम्पनीमा २९ हजार १ सय ११ मेट्रिक टन मल मौज्दात रहेको उनले बताएका छन्। जसमा युरिया १६ हजार ५ सय ३९ मेट्रिक टन, डीएपी ७ हजार ६ सय ५३ मेट्रिक टन र पोटास ४ हजार ९ सय १५ मेट्रिक टन छन्। त्यस्तै साल्ट ट्रेडिङ कम्पनीमा १३ हजार ७ सय १२ मेट्रिक टन मल मौज्दात छ, जसमा युरिया १० हजार ९ सय ८४ मेट्रिक टन, डीएपी ९ सय ४२ मेट्रिक टन र पोटास १ हजार ७ सय ८५ मेट्रिक टन रहेको छ।
प्रधानमन्त्री ओलीले कतै मलको अभाव महसुस भए तत्काल सम्बन्धित निकायलाई जानकारी दिन किसानलाई आग्रह गरेका छन्। यससँगै खेतबारी हराभरा बनाउन सन्देश समेत दिएका छन्।
