क्रान्ति केन्द्र सम्वाददाता
राजविराज । मधेश प्रदेशका श्रम तथा यातायात मन्त्री मनिष कुमार सुमनले लहान तथा जनकपुरधामस्थित यातायात कार्यालयको अनुगमन गरेका छन् ।
सोमबार उनी टोलीसहित दुवै कार्यालय अनुगमन गरेका हुन् ।
अनुगमनका क्रममा मन्त्री सुमनले कार्यालयमा कार्यरत कर्मचारीलाई अनिवार्य रूपमा पोशाक र परिचयपत्र लगाएर उपस्थित हुन निर्देशन दिएका छन् । उनले सेवाग्राहीले सहज रूपमा जानकारी पाउन नागरिक वडापत्र स्पष्ट रूपमा देखिने गरी राख्न पनि निर्देशन दिएको सो टोलीका सहभागी बसन्त यादवले बताए ।
सेवाग्राहीहरू घाममा बस्न बाध्य भएको अवस्थालाई ध्यानमा राख्दै मन्त्री सुमनले छिट्टै सेड (छायाँस्थल) निर्माण गर्ने प्रतिबद्धता व्यक्त गरे। साथै, लहानस्थित यातायात कार्यालयमा सुरक्षा गार्डको व्यवस्था गर्ने समेत उनले बताएका छन् ।
जेनजी आन्दोलनपछि जिर्ण अवस्थामा रहेको लहान यातायात कार्यालय हाल जसोतसो सञ्चालन भइरहेको पाइएको छ । मन्त्री सुमनले सेवा प्रवाहलाई प्रभावकारी बनाउन आवश्यक सुधारका कदम चालिने विश्वास दिलाए ।
यातायात कार्यालयमा विचौलिया हाबी भएर गर्ने काममा लागे पाइए कारबाही गर्ने मन्त्री सुमनले चेतावनी दिए ।
