क्रान्ति केन्द्र सम्वाददाता
राजविराज । सप्तरीको गजेन्द्र नारायण सिंह अस्पताल राजविराजमा दरबन्दी अनुसारको विशेषज्ञ स्वाथ्यकर्मीको निकै आभाव रहेको छ । सुरूदेखि नै दरबन्दी अनुसारका विशेषज्ञ चिकित्सकहरू मन्त्रालयले नपठाएपछि अहिले मेडिकल अधिकृतबाटै अस्पतालले विशेषज्ञ सेवा दिइरहेको छ । तर विरामीको चापले गर्दा सिमित चिकित्सकले सेवा प्रवाह सहज हुन सकेको छैन। पछिल्लो समय यहाँ दरबन्दी भइ काज सरूवामा रहेका ६ जना स्वास्थ्यकर्मीलाई मन्त्रालयले फिर्ता गर्ने निर्णय गरेपछि सेवा सुधार हुने अपेक्षा गरिएको छ। तर हालसम्म उनीहरु हाजिर भएका छैनन् । दरबन्दीअनुसार आवश्यक जनशक्ति नहुँदा समस्या अझै समस्या समाधान हुन नसकेको अस्पताल प्रशासनले बताउँछन् । उपचारका लागि आएका बिरामीलाई घण्टौ घण्टा पर्खिरहनुपर्ने बाध्यता रहेको सेवाग्राहीले गुनासो गरेका छन् ।
अस्पतालमा हाल विभिन्न महत्वपूर्ण पदहरू रिक्त रहेका छन्। अस्पताल प्रशासनका अनुसार ३ जना बरिष्ठ जनरल फिजिसियन, १ जना सर्जिकल विभाग विशेषज्ञ, ३ जना स्त्री तथा प्रसूति विभागका चिकित्सक, ३ जना बाल रोग विशेषज्ञ, १ जना प्याथलोजिष्ट, १ जना बरिष्ठ अस्पताल नर्सिङ्ग प्रशासक तथा २ जना नर्सिङ्ग अधिकृतको दरबन्दी खाली छ ।
अस्पताल ५० बेड सेवा भए अनुसारकै स्वीकृत दरबन्दी हो तर जनचाप अत्यधिक बढेका कारण सेवा भने हाल करिब एक सय ५० बेड बराबरको दिइँदै आएको प्रशासनको दाबी छ । यद्यपी पुरानै स्वीकृत दरबन्दीमा पनि कर्मचारी अभाव रहेको अस्पतालका सुचना अधिकारी दिपेन्द्र यादवले बताए । कर्मचारी नहुँदा बिरामीलाई सेवा दिन सक्दा रेफर गर्नुपर्ने बाध्यात्मक अवस्था रहेको अस्पताल प्रशासन प्रमुख रेमन्त यादवले बताए ।
काजमा रहेका स्वास्थ्यकर्मी फिर्ता भएसँगै केही राहत मिल्ने अपेक्षा गरिए पनि दीर्घकालीन समाधानका लागि दरबन्दीअनुसार स्थायी पदपूर्ति आवश्यक रहेको उनीहरुको भनाई छ ।
