क्रान्ति केन्द्र सम्वाददाता
राजविराज । २०७९को प्रतिनिधि सभा निर्वाचनमा सप्तरी-२बाट सिटिङ्ग सासंद जनता समाजवादी पार्टी नेपालका अध्यक्ष उपेन्द्र यादवलाई ऐतिहासिक मतान्तरले हराउँदै राजनीतिक हैसियत मजबुत बनाएका पात्र हुन डा. सीके राउत ।जनमत पार्टीका राष्ट्रिय अध्यक्ष डा.राउतलाई सो निर्वाचनमा यहाँका ३५ हजार ४२ मतदाताले मत दिएर संसदमा पाँच सालको लागि पठाएका थिए ।तर भदौ २३ र २४ गते भएको आन्दोलनले त्यो समय अवधि अगावै पुन: निर्वाचन निम्त्यायो । आसन्न फागुन २१ गतेको निर्वाचनको लागि उनी पुन: सप्तरी-२बाट चुनावी मैदानमा छन्।यसपटक यादव भने सप्तरी-३बाट मनोनयन दर्ता गराएका छन् ।
सप्तरी-२को मतदातालाई भेटन गइरहेका राउतलाई मंगलबार राजविराज नगरपालिका-१० दिघवामा एक मतदाताले कमलको फूल प्रदान गरेका छन् ।फूल दिएर स्वागत गर्दै मतदाताले उनीसँगको थप अपेक्षासहित सप्तरीको समस्या सुनाएका छन् ।डा राउतले यस सम्मानले आफुलाई थप बल दिएको बताएका छन् ।
मतदाताले नेतालाई निर्वाचनको समयमा स्वागत गर्ने गरेको घटना विरलै देखिन्छ ।राउतसँग यसपटक सप्तरी-२मा ३३जना उम्मेदवार प्रतिस्पर्धामा छ ।
