क्रान्ति केन्द्र सम्वाददाता
राजविराज । मङ्गलबार बालेन्द्र शाह सप्तरी आउने कार्यक्रम तय भएपछि सोमबार साँझदेखि सामाजिक सञ्जालमा त्यसको व्यापक प्रचारप्रसार भइरहेको देखियो। मङ्गलबार बिहानैदेखि उनका समर्थकहरु जिल्लाका विभिन्न ठाउँहरूमा उपस्थित भएको देखियो। बिहानैदेखि राजबिराजमा उनका समर्थकहरू माला लिएर स्वागतमा तैनाथ अवस्थामा थिए। जिल्लाका विभिन्न पालिकाबाट पनि समर्थकहरू शाहलाई देख्न राजविराज पुगेका थिए। मधेसका प्रणेता गजेन्द्र नारायण सिंहको राजराजस्थित रहेको सालिकमा माल्यार्पण गर्ने तयारी पनि गरिएको थियो। यद्यपि राजविराज आगमनसँगै व्यापक भीडले शाहको गाडी घेरिएपछि नओर्लिँदै राजबिराजबाट निस्के ।
गजेन्द्र चौकमा प्रतीक्षा गरिरहेका उनका समर्थकहरूलाई हात हल्लाउँदै र गजेन्द्र नारायण सिंहको सालिक नजिक रहेका समर्थकहरूलाई माला फेक्दै गाडीबाट अगाडि बढे। बालेन सालिक नजिक आउने अपेक्षामा उनका समर्थकहरू प्रतिक्षा गरिरहे पनि उनी आएनन् ।
मधेसवादी दलका समर्थकहरू शाहको माला फेक्ने प्रति गजेन्द्र नारायण सिंहको अपमान गरेको टिप्पणी गरिरहेका छन् भने उनका समर्थकले त्यो माला आफ्नो समर्थकलाई फ्याकेको स्पष्टीकरण दिइरहेका छन्।
बालेनको आगमनको खबरपछि आएको भीडले राजबिराज नगरपालिकाको यातायात अस्तव्यस्त बनेको थियो । राजबिराजबाट गाडी आगमन अवरोध पुगेको थियो । बालेनको चारै क्षेत्रको पार्टी कार्यालयहरूमा घन्टी हल्लाउने कार्यक्रम तय गरिए पनि त्यो पनि नगरिएको देखियो। सप्तरी छिरिएका बालेन राजविराजमा एक होटलमा खाना खान मात्र गाडीबाट ओर्लिए । अहिले बालेन सप्तरीबाट निस्किसकेको सप्तरीका जिल्ला प्रहरी प्रवक्ता डीएसपी डम्बर बहादुर पुरीले बताए ।
