क्रान्ति केन्द्र सम्वाददाता
राजविराज । नेपाली कम्युनिष्ट पार्टी (नेकपा) का केन्द्रीय सदस्य तथा पूर्व मन्त्री उमेश कुमार यादव मंगलबार जनता समाजवादी पार्टी (जसपा) नेपालमा प्रवेश गरेका छन् ।
जसपा नेपालको पार्टी कार्यालय बालकुमारीमा आयोजित एक कार्यक्रममा जसपा नेपालका अध्यक्ष उपेन्द्र यादवले यादवलाई औपचारिक रूपमा पार्टीमा स्वागत गरे ।
पार्टी प्रवेश कार्यक्रममा बोल्दै यादवले देशको वर्तमान राजनीतिक अवस्था, संघीयताको कार्यान्वयन, मधेशको अधिकार, पहिचान र सामाजिक न्यायका सवालमा जसपा नेपालको एजेन्डा स्पष्ट र जनमुखी रहेको भन्दै त्यसैमा विश्वास गरेर पार्टी प्रवेश गरेको बताए।
जसपा नेपालका अध्यक्ष उपेन्द्र यादवले यादवको प्रवेशले पार्टी संगठन सुदृढ हुनुका साथै मधेश आन्दोलन र समावेशी लोकतन्त्रको संघर्ष थप बलियो हुने विश्वास व्यक्त गरे। उनले अनुभवी नेता यादवको भूमिकाले पार्टीलाई राष्ट्रिय राजनीतिमा अझ प्रभावकारी बनाउन सहयोग पुग्ने बताए।
लामोसमय कम्युनिष्ट धारको राजनीतिमा अग्रणी भुमिका सक्रिय रहेका उनी अब समाजवादको बाटोमा आएका छन् । उनी जसपा नेपालमा प्रवेश गरेपछि सप्तरीमा जसपाको अवस्था बलियो र नेकपा कमजोर बनेको राजनीतिक विश्लेषको भनाई छ ।
