क्रान्ति केन्द्र सम्वाददाता
राजविराज । सप्तरीको बलानविहुल गाउँपालिकाका निर्वतमान अध्यक्ष दयानन्द गोइतको राष्ट्रिय स्वतन्त्रत पार्टी तर्फ झुकाव देखिएको छ । आइतबार सप्तरीको ४ नम्बर निर्वाचन क्षेत्रमा पार्टी रास्वपाको प्रवेश कार्यक्रमलाई सम्बोधन गर्दै उनले आफ्ना विचार सार्वजनिक गरेका छन् । यद्यपी उनले पार्टी प्रवेश गरेको देखिएको छैन् । जनता समाजवादी पार्टी नेपालबाट जसपा फुटेपछि जसपामा लागेका उनी जेनजी आन्दोलनदेखि स्वतन्त्र रहँदै आएको बताएका छन् । अहिले स्वतन्त्र व्यक्तिकै रुपमा कार्यक्रमलाई सम्बोधन गरेपनि रास्वपालाई सहयोग गरेको भन्दै उनको प्रशंसा भइरहेको छ ।
रास्वपाको पार्टी प्रवेश कार्यक्रमलाई सम्बोधन गर्दै दयानन्द गोइतले भनेका छन्, ‘आगामी दिनमा राजनीतिक यात्रा कुन मोड लिनेछ थाहा भएन तर तपाईँहरूको राम्रो उद्देश्य, विचारको कारण अहिले तपाईँहरूको एउटा सानो कडीको साथी सहयात्रीको रुपमा आएको छु।’
बलानविहुल गाउँपालिकामा अघिल्लो कार्यकालमा मिलोमतोमा ठेक्का गरेर राज्यको सम्पत्ति हानी नोक्सानी गरेको आरोपमा अख्तियार दुरुपयोग अनुसन्धान आयोगले उनीसहितकामाथि विशेष अदालतमा मुदा दायर गरेको छ ।
