क्रान्ति केन्द्र सम्वाददाता
राजविराज । सप्तरीको राजविराजस्थित गजेन्द्र नारायण सिंह अस्पतालमा तोडफोड गर्ने आरोपमा चार जनालाई पक्राउ गरेको छ।
प्रहरीले अस्पतालमा उपद्रव गर्ने आरोपमा राजविराज नगरपालिका –४का विनित चौहान, उदय ठाकुर, बिष्णुपुर गाउँपालिका–६ परमेश्वर यादव र उनका छोरा रमण यादव पक्राउलाई जिल्ला प्रहरी कार्यालय सप्तरीका एसपी गौतम कुमार केसीले जानकारी दिए ।
चिकित्सकमाथि भएको हातपातप्रति विरोध जनाउँदै आकस्मिक (इमर्जेन्सी) सेवा बाहेकका सबै सेवा अनिश्चितकालका लागि बन्द गर्ने निर्णय गरेको छ।
अस्पताल प्रशासनका अनुसार आइतबार दिउँसो ४ बजे अस्पतालको नवजात शिशु सघन कक्ष (NICU) मा सर्टसर्किट भई उपचाररत रेखा यादवकी नवजात शिशुलाई छाला र कपालमा जलन घटना भएको थियो। उक्त घटनापछि आक्रोशित बिरामी पक्षका व्यक्तिहरूले निमित्त मेसु डाक्टर दिलिप साहलाई हातपात गरेका थिए।
त्यसपछि अस्पताल परिसरमा तोडफोड र आगजनी समेत भएको अस्पतालले जनाएको छ। यस्ता घटनाले स्वास्थ्यकर्मीहरूको मनोबल कमजोर पार्ने भन्दै अस्पताल प्रशासनले सबै कर्मचारीको सुरक्षाको पूर्ण प्रत्याभूति नहुँदासम्म आकस्मिक सेवा बाहेक अन्य सबै सेवा बन्द गर्ने निर्णय गरेको हो।
