क्रान्ति केन्द्र सम्वाददाता
राजविराज । जेन–जी समुह सप्तरीले गजेन्द्रनारायण सिंह अस्पताल राजविराजमा निमित्त मेडिकल सुपरिटेन्डेन्ट नपठाउनसहितका चारबुँदे मागसहित स्वास्थ्यमन्त्रीलाई ज्ञापनपत्र दिएका छन् ।
जिल्ला प्रशासन कार्यालय मार्फत स्वास्थ्यमन्त्रीलाई ज्ञापनपत्र दिन उनीहरूले बुधबार सप्तरीका प्रमुख जिल्ला अधिकारी टुवराज पोखरेललाई ज्ञापनपत्र हस्तान्तरण गरेका हुन् ।
मन्त्रालयले अस्पतालमा निमित्त मेसु पठाउन लागिएको बिषय जानकारीमा आएको भन्दै जेन–जी समुह सप्तरीले दरबन्दी अनुसारकै तहको मेसु राख्न आग्रह गरेका छन् ।
यससाथ उनीहरूले उक्त अस्पतालमा दरबन्दी रहि काजसरुवामा रहेका चिकित्सक तथा कर्मचारीलाई फिर्ता वा वैकल्पिक व्यवस्था गर्न, अस्पताललाई शिघ्र तीन सय बेडको लागि आवश्यक व्यवस्था मिलाउन र अस्पतालमा थप विशेष सेवा थप्न मन्त्रालयले सहयोग गर्न माग गरेका छन्।
मन्त्रालयले अस्पतालमा रहेको समस्या समाधान गर्न भुमिका निर्वाह नगरेको तर पछिल्लो मन्त्री र कर्मचारीले निजी स्वार्थमा मेसु फेरबदल गर्ने गरेको आरोप समेत लगाएको छ ।
‘संघ सरकार अन्तर्गत सञ्चालित सप्तरीको राजविराजस्थित गजेन्द्रनारायण सिंह अस्पताल जिल्लाको एक मात्र ठूलो अस्पताल हो । तर यस अस्पतालमाको अवस्था सुरुदेखि नै अत्यन्तै दयनीय रहेको छ । दरबन्दी अनुसारका अस्पतालमा स्वास्थ्यकर्मी र प्रशासन कर्मचारीको आभाव व्याप्त छ,’ ज्ञापनपत्रमा भनिएको छ, ‘यहाँ दरबन्दी रहेका कर्मचारी/चिकित्सकहरू लामो समयदेखि काज सरुवामा रहेको बिषय संचारमाध्यमहरूमा समेत आइरहेको छ। कर्मचारी आभावका कारण अस्पतालमा एचडियु, आइसियु लगायतका विशेष सेवाहरू सुचारू हुन सकेको छैन् । तीन सय बेडको भौतिक संरचना अस्पतालमा तयार भएपनि पचास बेड मात्रकै स्विकृति भएकोले सोही अनुसार दरबन्दी रहेको छ र त्यसमा पनि कर्मचारी काज सरुवामा छन् । यस्तोमा अस्पतालको अवस्था कस्तो हुने कुरा समान्य बुझाईले बुझ्न सकिन्छ ।’
मन्त्रालयले दरबन्दी अनुसारका मेसुलाई हटाएर एक तह तल्लो स्तरका मेसुलाई निमित्तको जिम्मेवारी दिए जेन–जी सप्तरीले सशक्त आन्दोलन गर्ने चेतावनी समेत दिइएको छ ।
