विपिन यादव
राजविराज । जनमत पार्टीका अध्यक्ष डा.सीके राउत संघीय सांसदमा निर्वाचित भएपछि राजविराजमा दोस्रो पत्रकार सम्मेलन गरेका छन् । प्रेस जनमत संघले आइतबार राजविराज आयोजना गरेको पत्रकार भेटघाट कार्यक्रममा उनी दोस्रो पटक सप्तरीमा पत्रकारसँग कुरा गरेका हुन् । यसअघि उनी संसद बहाल रहँदा एक पटक पत्रकार सम्मेलन गरेका थिए ।
आइतबार पत्रकार सम्मेलनमा उनले विभिन्न मुद्दामा चर्चा गरे।
संसद विघटन कानुन सम्वत नरहेपनि प्रतिनिधि सभाको निर्वाचन तोकिएकै समयमा गराउनुपर्ने उनको धारणा छ । पुन: प्रतिनिधि सभा कायम गरिए आन्दोलनकारीको मनोभावनामा ठेस लाग्ने उनको धारणा छ । ताजा चुनावी म्यानडेडको लागि समयमै निर्वाचन गराउनुपर्ने बताए ।
जनता समाजवादी पार्टी नेपालसँग जनमत पार्टीको कुनै द्वन्द नरहेको बताउँदै उनले आवश्यकता परे सहकार्य गर्न तयार रहेको बताए । माथिल्लो स्तरमा एकअर्का पार्टीसँग राजनीतिक एजेन्डामासँगै छलफल हुने गरेकोले धरातलमा काम गर्ने कार्यकर्तालाई पनि एकअर्का पार्टी कार्यकर्ताबीच विवाद नगर्न आग्रह गरे ।
सरकारले निर्वाचन अघि नोटबन्दी गरे केही हदसम्म निर्वाचन स्वच्छ हुने बताएका छन् । अहिले निर्वाचन अघि सरकारले नोटबन्दी गरे निश्चित परिवर्तन देखिने उनले बताए । उनले नोटबन्दीले नयाँ युवाहरुलाई अश्वस्त गर्ने बताउँदै उनले यस्तो कदममा आफ्नो पार्टीले पनि सघाउने बताए ।
‘नेपाली अर्थतन्त्रमा अनौपचारिक तरिकाबाट पैसाको प्रवाह बढी भइरहेको छ, त्यही भएर डिमोनिटाइजेसन गरियो भने पुरै नभएपनि निर्वाचन केही हदसम्म स्वच्छ हुन्छ,’ उनले भने, ‘यो प्रस्ताव कसैले राख्छ भने त्यसमा हाम्रो समर्थन हुन्छ ।’
जेन–जी आन्दोलनको सोच सकारात्मक रहेपनि उनीहरूसँग रोड म्याप नरहेको राउतले टिप्पणी गरे । उनले जेन–जीले के गर्न खोजेको अन्यौलता आफैमा रहेको बताए।
व्हाटस्याप र फेसबुक स्कुलिङ्गका युवाहरुले संघीयता नचाहिने भन्ने गरेको टिप्पणी गर्दै उनले यसमा चिन्ता व्यक्त गरे । लहैलहैमा संघीयता नचाहिने नभनि विचार अध्ययन गरेर तर्कसँग कुरा गर्न उनले आग्रह गरे ।
