क्रान्ति केन्द्र सम्वाददाता
राजविराज । भदौ २३ र २४ गते भएको जेन जी आन्दोलनले देशमा राजनीतिक उथलपुथल भयो । आन्दोलनकै आडमा नेता, जनप्रतिनिधिदेखि सरकारी अड्डाहरु आगजनी भयो , लुटियो । आन्दोलन उग्र भएपछि प्रधानमन्त्रीसँगै मन्त्री, सांसद, मुख्यमन्त्रीको राजीनामाको होड चल्यो । जेन जी आन्दोलनलाई समर्थन गर्दै भन्दै राजीनामा दिने क्रम सुरु भयो ।
त्यसमा मधेश प्रदेशका मुख्यमन्त्री सतिश कुमार सिंह पनि आए । मुख्यमन्त्रीमा सबभन्दा फस्ट २४ गते राजीनामा दिएर उनी चर्चामा आए । त्यसयता उनको चर्चा रोकिएको छैन् । राजीनामा दिने अन्यको चर्चा नभएपनि उनको लगातार भइरहेको छ । फेसबुकमा मात्र राजीनामा दिएका उनले प्रदेश प्रमुखलाई पत्र बुझाएका थिएनन् । सोहीकारण उनको राजीनामा औपचारिक भएन। त्यसपछि २६ गते मुख्यमन्त्री सिंहले परिस्थिति बदली सकेको भन्दै राजीनामा नदिने बोली फेरेपछि उनको चर्चा निरन्तर छ ।
जनमत पार्टीबाट सिंह मुख्यमन्त्री छन् ।उनीसहित मधेश सरकारमा दुई जना मन्त्री अझै सहभागी थिए । मुख्यमन्त्री सिंहले बोली फेरेपनि जनमत पार्टीका संसदीय दलका नेता महेश यादवले २८ गते प्रदेश प्रमुखलाई पत्र लेख्दै आफ्नो पार्टी सरकारबाट समर्थन फिर्ता लिएको जानकारी गराए । सोही पत्रमा मन्त्री र मुख्यमन्त्रीलाई फिर्ता गरेको जानकारी समेत थियो ।
ब्याक डेटमै दुई मन्त्रीको राजीनामा
२८ गते संसदीय दलले मन्त्री र मुख्यमन्त्रीलाई फिर्ता बोलाएको जानकारी दिएपनि दुई मन्त्रीको राजीनामा ३१ गते मात्र सार्वजनिक भयो। सार्वजनिक पत्र २४ गतेकै ब्याकडेटमा लेखिएको पनि देखिएको छ।
वन तथा वातावरण मन्त्री संजय यादव र उद्योग वाणीज्य तथा पर्यटन मन्त्रालय ई.वसन्त कुशवाहाले राजीनामा दिएको पत्र सार्वजनिक भएको छ ।
मन्त्रीहरूले मुख्यमन्त्री समक्ष राजीनामा दिइसकेको पत्र सार्वजनिक भएपनि मुख्यमन्त्री सिंहले हालसम्म राजीनामा दिएको छैन् ।
जनमतमा दुई गुट
मुख्यमन्त्रीले दिएको राजीनामा फिर्ता लिनु र संसदीय दलले मुख्यमन्त्रीलाई फिर्ता बोलाएको पत्र दिनुले जनमत पार्टीमा दुई भाग देखिएको छ । सार्वजनिक रुपमा दुई भाग भएको जानकारी नभएपनि आन्तरिक रुपमा पार्टीमा विवाद रहेको आम नागरिकमा अन्यौलता देखिएको छ ।
