क्रान्ति केन्द्र सम्वाददाता
राजविराज। सप्तरीको तिलाठी कोइलाडी गाउँपालिकाका दुई जना उत्कृष्ट विद्यार्थीलाई अमरनाथ झा स्मृति पुरस्कार–२०८२ प्रदान गरिएको छ।
प्रधानाध्यापक झाको स्मृतिमा अमरनाथ झा मेमोरियल ट्रष्टले सोमबार पुरस्कार वितरण कार्यक्रम आयोजना गरि २०८१को एसईईमा पालिकामा सर्वाधिक अंक ल्याउने एक छात्र र एक छात्रालाई पुरस्कृत गरेका हो ।
पुरस्कृत हुनेमा छात्रतर्फ जनता माध्यमिक विद्यालय तोपाका ओमनारायण यादव र छात्रातर्फ पब्लिक माध्यमिक विद्यालय लौनियाँ तिलाठीकी पल्लवी ठाकुर छन्। उनीहरूलाई जनही पच्चीस हजार पाँचसय नगदसहित सम्मानपत्र पत्र प्रदान गरिएको छ।
ट्रष्टद्वारा निर्मित पुरस्कार छनौट समितिले सिफारिस गरे अनुसार दुवै जनालाई ५१ हजारको नगद राशीलाई बराबर बाँडेर दिएको ट्रष्टका कार्यकारी अधिकृत प्रवेश कुमार मिश्रले बताए।
‘स्मृति पुरस्कारको राशी ५१ हजार रहेको छ, यसपटक छनौट समितिले दुई जनालाई दिन सिफारिस गरेपछि हामीले सोही अनुसार बराबर नगद दियो,’ उनले भने, ‘यसले विद्यार्थीहरूलाई अगामी शैक्षिक यात्रामा केही सहज गर्नेछ, हामी यस्ता सहयोगका लागि निरन्त तत्पर छौँ।’
प्रत्येक बर्ष वितरण गरिने अमरनाथ झा स्मृति पुरस्कार पाँच विधामा दिने ट्रष्टको सोच रहेको ट्रष्टका अध्यक्ष राजीव कुमार झाले बताए । यद्यपी यसमा अझै छलफल गर्न बाँकी रहेको उनले बताए।
‘पुर्वप्रधानाध्याक झा शैक्षिक पेशा, समाजिक, कलाकारिता, खेलकुद, पत्रकारिता क्षेत्रमा समेत योगदान पुर्याएकोले उहाँको योगदानलाई कदर गर्दै यी पाँचै विधामा मध्येकालाई प्रत्येक बर्ष दिने घोषणा गरेका छौँ तर शैक्षिक पेशालाई मात्रै गर्ने की सबै त्यसमा हामी छलफलमा छौँ,’ अध्यक्ष झाले भने।
कार्यक्रममा प्रमुख अतिथि तिलाठी कोईलाडी गाउँपालिका अध्यक्ष अरुणकुमार मण्डल र विशिष्ट अतिथि समाजसेवी इन्जिनियर शैलेन्द्रमोहन झा, जसपा केन्द्रिय सदस्य डा. बबी सिंह यादव, वडा नम्बर १ का अध्यक्ष दिनेश्वर मिश्र, वडा नम्बर २ का अध्यक्ष कमल मण्डल, पुरस्कार छनोट समिति संयोजक दयाकान्त झा, सदस्य निरज मुक्ति, ट्रष्टका सल्लाहकार शम्भु झा लगायतका व्यक्तिले अमरनाथ झाको शैक्षिक र सामाजिक योगदानबारे चर्चा गरे।
