क्रान्ति केन्द्र सम्वाददाता
राजविराज । नेपाल पत्रकार महासंघमा आस्थाका आधारमा सदस्यता नवीकरण र नयाँ सदस्यता वितरणमा विभेद भइरहेको आरोप लगाउँदै प्रेस जनमत संघले महासंघको केन्द्रीय समितिलाई ज्ञापनपत्र बुझाएको छ।
प्रेस जनमत संघका अध्यक्ष अवधेश कुमार झासहितको टोलीले आइतबार महासंघ अध्यक्षलाई ज्ञापनपत्र बुझाएको हो।
‘महासंघ सबै पत्रकारहरूको साझा संगठन भएकाले निष्पक्ष र साझा चरित्रमा क्रियाशील रहनुपर्ने छ,’ अध्यक्ष झाले भने, ‘तर पछिल्लो समय फरक आस्थाका पत्रकारहरूको सदस्यता नवीकरण नगर्ने वा नयाँ सदस्यता अस्वीकृत गर्ने प्रवृति आपत्तिजनक छ।’
ज्ञापनपत्रमा काठमाण्डौं र तराई–मधेशका जिल्लाहरूमा फरक–फरक मापदण्ड लागू गरी सदस्यता खारेज गर्नु अन्यायपूर्ण भएको ठहर गरिएको छ। संघले गत निर्वाचनको समयमा शुद्धिकरणको नाममा भएको अन्यायलाई तत्काल सच्याउन माग गरेको छ।
सबै पत्रकारले अपनत्वको अनुभव गर्ने वातावरण निर्माण गर्न महासंघ नेतृत्वलाई ज्ञापनपत्रमा अनुरोध गरिएको छ।
सो टोलीले आम संचार प्राधिकरण मधेश प्रदेशका अध्यक्ष जितेन्द्र खड्गा, महासंघ सप्तरीका उपाध्यक्ष रामनारायण विश्वाससहितका सहभागी थिए।
