क्रान्ति केन्द्र सम्वाददाता
राजविराज। मधेश प्रदेशका मुख्यमन्त्री सतिश कुमार सिंह आज विहान मलेसिया पुगेका छन् । उनलाई क्वालालम्पुर अन्तर्राष्ट्रिय विमानस्थलमा नेपाली राजदूतावासका राजदूत डा. नेत्रप्रसाद तिमल्सिना, एनआरएनए मलेसियाका अध्यक्ष राकेश प्रसाद महतो, महासचिव विष्णु बराल, सचिव उमेश महतो, गैरआवासीय मधेसी संघ मलेसियाका अध्यक्ष महेश्वर यादव ‘निराला’, मलेसियामा कार्यरत पत्रकार तथा विभिन्न राजनीतिक दलका प्रतिनिधिहरूले स्वागत गरेका छन् ।
यस भ्रमणको क्रममा सिंहले मलेसियामा कार्यरत हजारौं नेपाली कामदारहरूको वास्तविक अवस्था, समस्या र अनुभव प्रत्यक्ष सुन्ने, सरोकारवालासँग छलफल गर्नेसँगै आवश्यक पहल गर्ने जनाएका छन्। वैदेशिक रोजगारीमा रहेका नेपालीहरूको हकहितमा ठोस कार्य गर्न सकिने अवसरका रूपमा यस भ्रमणलाई लिइएको छ ।
आज साँझ ६ बजेदेखि १० बजेसम्म क्वालालम्पुरस्थित होटल ग्राण्ड कण्टिनेन्टलको सभाहलमा गैरआवासीय नेपाली संघ (एनआरएनए) मलेसियाद्वारा आयोजना हुने हरितालिका तीज विशेष कार्यक्रमलाई पनि सिंहले सम्बोधन गर्ने कार्यक्रम रहेको मुख्यमन्त्रीका प्रेस सल्लाहाकार अवधेशकुमार झाले बताए। मुख्यमन्त्री सिंह भदौ १० गते स्वदेश फर्किने कार्यतालिका रहेको प्रेस सल्लहाकार झाले बताए।
