क्रान्ति केन्द्र सम्वाददाता
राजविराज। जनता समाजवादी पार्टी नेपालको अध्यक्ष उपेन्द्र यादवले कांग्रेस, कम्युनिष्टले नेपालमा एकल जातीय व्यवस्था लाधेको आरोप लगाएका छन्। जसपा नेपाल सप्तरीको निर्वाचित जिल्ला कार्यसमितिको पदभार तथा सपथ ग्रहण कार्यक्रमलाई बुधबार राजविराजमा सम्बोधन गर्दै उनले यसले देशको एकतामा गम्भीर असर पर्ने बताए।
न्यायपरिषदद्वारा भएको २८ जना न्यायाधीश नियुक्तिमा २७ जना एकै जातको रहेको लगायतका उदाहरण दिँदै उनले राजनीतिक नियुक्ति समावेशी नभइ एकल जातीय हुने गरेको आरोप लगाए। सरकारी आकंडाले पनि यसलाई स्पष्ट पारेको अध्यक्ष यादवले दावी गरे।
एकल जातीय चिन्तनले राज्य व्यवस्था चलाउने अभ्यास गरिरहेको वर्तमान सरकार असफल सरकार रहेको उनको भनाई छ।
‘भ्रष्टाचार नियन्त्रणको नाम निशान नै छैन्, शिक्षाको अवस्था एकदमै खस्किदो छ, सुशासनको नाममा सरकारले कुशासन कायम गरेको छ,’ अध्यक्ष यादवले भने, ‘देशमा ऋणको बौझ थुप्रिएको छ, ऋणको व्याज तिर्न पनि ऋणै लिएको अवस्था छ, विदेशको अनुदान पनि भ्रष्टाचार गरेर सिध्याइरहेको छ।’
प्रदेश स्थापनाको दश बर्ष बित्दा पनि नाम मात्रको प्रदेश रहेको बताउँदै उनले सरकारले संघीयता कमजोर पारिरहेको आरोप लगाए।
‘प्रदेशलाई आफ्नो प्रहरी छैन्, कर्मचारी छैन्, यो कस्तो सरकार भयो, नाम मात्रको प्रदेश छ यहाँ,’ उनले भने।
