क्रान्ति केन्द्र सम्वाददाता
राजविराज। मधेश प्रदेशका मुख्यमन्त्री सतिशकुमार सिंहले राजविराजस्थित गजेन्द्रनारायण सिंह औद्योगिक क्षेत्रमा ठुला उद्योगको प्रचुर सम्भावना रहेको बताएका छन्।
मंगलबार औद्योगिक क्षेत्रको अवलोकन र निरीक्षण गर्दै उनले ठुला उद्योगको सम्भावना बारे चर्चा गरे।
‘ठूला उद्योग स्थापना भए रोजगारीका अवसर सिर्जना हुनुका साथै राजस्व संकलनमा वृद्धि भई स्थानीय, प्रदेश र राष्ट्रिय आर्थिक विकासमा महत्वपूर्ण टेवा पुग्ने छ’, सिंहले भने।
वि.सं. २०४४ मा स्थापना भएको यो औद्योगिक क्षेत्रमा विभिन्न समस्याहरू हुँदाहुँदै हाल १२ वटा उद्योग सञ्चालनमा छन् भने थप १० वटा प्लट नयाँ उद्योग स्थापनाको प्रतिक्षामा छन्।
औद्योगिक क्षेत्रमा ढल निकास, खानेपानीलगायतका आधारभूत पूर्वाधारका समस्या समाधानका लागि प्रदेश सरकारले चालु आर्थिक वर्षमा ८० लाख रुपैयाँ विनियोजन गरिसकेको जानकारी दिँदै सिंहले सुरक्षाका लागि आवश्यक सुरक्षाकर्मीको व्यवस्था गर्न पहल भइरहेको बताए।
मधेश प्रदेश सरकार औद्योगिक क्षेत्रको समग्र विकासका लागि प्रतिबद्ध रहेको र उद्योगपतिहरूलाई यस क्षेत्रमा लगानी गर्न निरन्तर आग्रह गरिरहेको उनले स्पष्ट पारे।
सो अवसरमा गजेन्द्र नारायण सिंह औद्योगिक क्षेत्र व्यवस्थापन कार्यालयका कामु प्रमुख मनिष कुमार मिश्र र उद्योगी मिलन सिंहले औद्योगिक क्षेत्रको वर्तमान अवस्था र विद्यमान समस्याबारे सिंहलाई विस्तृत जानकारी गराए।
