विपिन यादव
राजविराज। नेपाल सरकारका पूर्वमन्त्री तथा संविधानसभा सदस्य उमेश यादवको नेतृत्वमा सोमबार सप्तरीमा पैदल यात्रा निकालिएको छ। सदरमुकाम राजविराजदेखि सखडा हुँदै गोबिन्दपुरसम्मको सडक ठेक्का लागेर पनि लामो समयदेखि अधूरो रहेकोले दबाब दिन पैदल यात्रा र दिउँसै मैनबत्ती बालेर स्थानीयले प्रदर्शन गरेका हुन्।
यो सडक प्रसिद्ध शक्तिपीठ छिन्नमस्ता मन्दिर जाने मुख्य बाटो भएकोले दैनिक हजारौं दर्शनार्थी आवतजावत गर्ने गर्छन्। ठेकेदारले काम छाडेपछि यात्रुहरूलाई अत्यन्तै कठिनाइ भइरहेको छ। तर, सरकारले यसमा ध्यान नदिएको आरोप लगाए।
यात्रापछि सञ्चारकर्मीसँग कुरा गर्दै यादवले सार्वजनिक खरीद ऐनमा व्यापक संशोधनको आवश्यकता औंल्याए। उनका अनुसार ऐनमा सरकारले चलखेल गर्ने र त्यसको फाइदा निर्माण व्यवसायीले उठाउने गर्छन्। ‘एक ठेक्कामा कति बिलो हुने, एक जनाले कति ठेक्का लिन पाउने भन्ने प्रष्ट व्यवस्था हुनुपर्छ। तर अर्थ समितिदेखि अर्थ मन्त्रालयसम्म सरकारले चलखेल गर्छ र निर्माण व्यवसायी यसकै फाइदा उठाउँछन्, माननीयले ताली बजाएर कानुन पास गर्छन् तर त्यसमा के लेखेको छ थाहा हुँदैन,’ उनले भने।
जनप्रतिनिधिले चेतना बढाउनुपर्ने उल्लेख गर्दै उनले सबै सचिव नागरिकलाई आफ्नो अधिकारका लागि आन्दोलनमा उत्रिन आग्रह गरे। ‘ निर्जिवले आन्दोलन गर्दैन, सजिवले गर्नुपर्छ, नरोए बच्चालाई आमा दुध खुवाउँदैन, हाम्रो बहिरो सरकार आफै कहाँबाट सुन्छ,’ उनले कटाक्ष गरे।
उनले यससँगै राजविराज–हनुमाननगर, पातो–कठौना र राजविराज–तिलाठी हुँदै रम्पुरा मल्हनियाँ सडक पनि शीघ्र पूरा गर्न माग गरे। सरकार नसुनेमा हस्ताक्षर अभियान चलाउने र त्यसपछि पनि बेवास्ता भए सांसद तथा मन्त्रीले दुर्दशा भोग्ने चेतावनी उनले दिए।
