क्रान्ति केन्द्र सम्वाददाता
राजविराज। सप्तरीको राजगढ गाउँपालिका–२ मा प्रहरीले चलाएको गोली लागि लालु यादवको मृत्यु भएपछि स्थानीय र उनका आफन्त आन्दोलनमा रहेका छ्न्।
बुधबार दिनभरि आन्दोलन गरेका उनीहरूले संघर्ष समिति बनाएर चार बुँदे मागसहित प्रमुख जिल्ला अधिकारीलाई ज्ञापन पत्र बुझाए।
उनीहरूले गोली चलाउने दोषी प्रहरी निरीक्षक बिरेन्द्र कुमार यादवलाई निलम्बन गरी कर्तव्य ज्यान मुद्दामा कडा कारबाही गर्न माग गरेका छन्। संघर्ष समितिले मृतक लालु यादवलाई सहीद घोषणा गर्न र परिवारलाई उचित क्षतिपूर्ति उपलब्ध गराउन तथा सीमावर्ती बासिन्दाको सुरक्षाको प्रत्याभूति दिलाउन माग राखेका छन्।
घटनाको निष्पक्ष र उच्चस्तरीय छानबिनका लागि आयोग गठन गर्नुपर्ने समेत मागमा उल्लेख छ।
उद्योग वाणिज्य संघ, सप्तरीले घटनाप्रति आक्रोश व्यक्त गर्दै बिहिबार राजविराज बजार बन्दको आह्वान गरेको छ। संघले लालु यादव एक विद्यालय व्यवस्थापन समितिका अध्यक्ष तथा लाइसेन्ससहित मदिरा व्यपार गर्ने कारोबारी रहेकोले व्यपारीको हत्या भएको भन्दै संघले बन्द आह्वान गरेका छन्। राजविराजमा बिहानैदेखि पसलहरु बन्द छ।
मृतक यादवको शव हालसम्म पोस्टमार्टमका लागि राजविराजस्थित गजेन्द्र नारायण सिंह अस्पतालमा राखिएको छ। बुधबार प्रदर्शनकारीले दिनभरि प्रदर्शन गरेका थिए। भीड आक्रमक बनेपछि प्रहरीले साँझ अश्रुग्याँस फाइर गरि भीडलाई तितरवितर पारेका थिए।
यता सप्तरी प्रहरीले सर्च अप्रेसनमा पुगेका प्रहरीलाई स्थानीयले ढुंगामुढा गरेपछि आत्मरक्षाका लागि चलाइएको गोली लालुलाई लागेको बताउँदै आएको छ।
