कान्ति केन्द्र सम्वाददाता
राजविराज। सप्तरी जिल्लामा लामो समयदेखि पानीको अभावका कारण धान रोपाइँ प्रभावित भएपछि कोशी पम्प क्यानलमार्फत सिंचाइ व्यवस्था मिलाउन प्रमुख जिल्ला अधिकारी (प्रजिअ) भोला दाहाल आफैं सक्रिय भएका छन्।
बुधबार प्रजिअ दाहालले तीनवटा पम्प क्यानलको अनुगमन गर्दै कर्मचारीलाई खेतसम्म पानी पुर्याउने देखिएको समस्या तत्काल समाधान गर्न निर्देशन दिएका छन्।
उनले नहरबाट पानी व्यवस्थापन, पम्प सञ्चालनको अवस्था र पानी प्रवाहको निरीक्षण गरेका थिए।
जिल्लामा यस वर्ष हालसम्म जम्मा ३७ प्रतिशत मात्र धान रोपाइँ भएको तथ्यांक रहेको छ। सामान्यतया साउनको दोस्रो सातासम्म अधिकांश खेतमा रोपाइँ सकिने भए पनि यसपटक पर्याप्त वर्षा नभएको र सिंचाइ व्यवस्था कमजोर हुँदा रोपाइँ प्रभावित भएको हो।
नहरको पानी किसानको खेतसम्म नपुग्ने गुनासो स्थानीयस्तरबाट लगातार आइरहेका बेला प्रजिअ दाहाल स्वयं फिल्डमा खटिएर अवस्थाको मूल्याङ्कन गर्न पुगेका हुन्।
प्रजिअ दाहालले भने, ‘धान उत्पादनमा ठूलो असर पर्ने स्थिति आएको छ। किसानको खेतमा तत्काल पानी पुर्याउने व्यवस्था मिलाउन हामी संकल्पित छौं, हामीले सकेजति काम गरेर किसानलाई राहत दिने प्रयास गर्छौं।’
खानेपानीका लागि प्रयोगमा रहेका ट्यूवेल तथा बोरिङमा समस्या भएमा तथा सिंचाइका लागि प्रयोग भएका नहरहरुमा समस्या परेमा जिल्ला प्रशासन कार्यालयले सम्पर्क गर्न मोबाइल नम्बर सार्वजनिक गरेको छ।
समस्या परे प्रमुख जिल्ला अधिकारी भोला दाहाल (९८५२८५७७७७) र प्रशासकीय अधिकृत जितेन्द्र कुमार पासवान(९८५२८२२५७७) नम्बरमा सम्पर्क गर्न भनिएको छ। बर्षा नहुँदा सप्तरी जिल्लाको विभिन्न ठाउँमा खेती योग्य जग्गाहरुमा सिंचाईको अभाव भई खेती हुननसकेको र धेरैजसो गाउँ तथा वस्तीहरुमा खानेपानीको स्रोत घटी खानेपानीको अभाव समेत भएको छ।
