क्रान्ति केन्द्र सम्वाददाता
राजविराज– सप्तरीको डाक्नेश्वरी नगरपालिका–४ स्थित कुशहा टोल सडक खण्डबाट प्रहरीले ठूलो परिमाणमा अवैध मदिरा बरामद गरेको छ।
इलाका प्रहरी कार्यालय पातोबाट गस्तीमा खटिएको प्रहरी टोलीले ७४ कार्टुन मदिरा फेला पारेको हो।
प्रहरीका अनुसार नेपालबाट भन्सार छली चोरी पैठारी गरी मानिसहरूले बोरा टाउकोमा बोकी भारततर्फ लैजाँदै गरेका थिए। प्रहरीले गस्ती गर्ने क्रममा टोली देखेपछि ती व्यक्ति बोरा सोही स्थानमा छाडेर फरार भएका थिए।
पक्राउ परेको ७४ कार्टुनमध्ये ‘मामाश्री’ र ‘दिलवाले’ ब्रान्डका मदिरा रहेको सप्तरी प्रहरीले जनाएको छ। बरामद गरिएको मदिराको मूल्य झण्डै ७४ हजार रुपैयाँ बराबरको रहेको र उक्त मदिरा आवश्यक कारबाहीका लागि भन्सार कार्यालयमा बुझाइएको प्रहरीले जानकारी दिएको छ।
भारतको बिहार राज्यमा मदिरा प्रतिबन्धित भएकोले सप्तरीको खुलासीमा नाकाबाट व्यापक रुपमा मदिरा भारत तस्करी हुने गरेको छ। यद्यपी यसमा संलग्न गिरोहलाई सप्तरी प्रहरीले समात्न सकेको छैन्।
