क्रान्ति केन्द्र सम्वाददाता
राजविराज।सामाजिक उत्तरदायित्व कार्यक्रम अन्तर्गत सिटिजन्स बैंक इन्टरनेसनल लिमिटेड, शाखा कार्यालय कल्याणपुरले सप्तरीको खडक नगरपालिका–७ स्थित श्री राष्ट्रिय प्राथमिक विद्यालय मझौलाई शुद्ध पिउने पानीको मेसिन (RO फिल्टर) प्रदान गरेको छ। विद्यालयमा अध्ययनरत ९० जना विद्यार्थीलाई लक्षित गर्दै गरिएको यस सहयोगले गुणस्तरीय शिक्षासँगै स्वास्थ्यलाई पनि प्राथमिकतामा राखिएको बैंकको भनाइ छ।
विद्यालय परिसरमा आयोजित कार्यक्रममा सिटिजन्स बैंकका कलस्टर प्रमुख प्रकाश नेपाल, शाखा प्रमुख फिरोज अहमद, कर्मचारीहरू परीबेश मिश्र र संजिव गुप्ता तथा विद्यालयका प्रधानाध्यापक किशोर कुमार चौधरीको उपस्थिति रहेको थियो।
कार्यक्रममा बोल्दै शाखा प्रमुख फिरोज अहमदले बालबालिकाको स्वास्थ्य र विकासप्रति बैंक सदैव संवेदनशील रहेको उल्लेख गर्दै भविष्यमा पनि यस्ता सामाजिक कार्यमा सक्रिय भूमिका खेल्ने प्रतिबद्धता व्यक्त गरे। “शिक्षा र स्वास्थ्य कुनै पनि राष्ट्रको मेरुदण्ड हो। यी दुई क्षेत्रमा लगानी गर्नु भनेको भविष्यमा समृद्ध राष्ट्र निर्माणतर्फको लगानी हो,” अहमदले भने।
कलस्टर प्रमुख प्रकाश नेपालले विद्यालयमा पिउने पानीको उचित व्यवस्था नहुनाले विद्यार्थीको स्वास्थ्यमा पर्ने असरलाई मध्यनजर गर्दै आरओ फिल्टर जडान गरिएको जानकारी दिए। “हामी बैंक मात्र होइन, समाजप्रति उत्तरदायी संस्था पनि हौं,” उनले थपे।
विद्यालयका प्रधानाध्यापक किशोर कुमार चौधरीले सिटिजन्स बैंकप्रति आभार व्यक्त गर्दै विद्यालयमा शुद्ध पिउने पानीको सुविधा अभाव रहेको र उक्त मेसिनले बालबालिकाको स्वास्थ्यमा सकारात्मक प्रभाव पार्ने विश्वास व्यक्त गरे। “हामीजस्ता ग्रामीण विद्यालयमा यस्ता सहयोगले ठूलो अर्थ राख्छ,” चौधरीले भने।
सामाजिक उत्तरदायित्व अन्तर्गत बैंकले विभिन्न विद्यालय, स्वास्थ्य चौकी, सार्वजनिक स्थलहरूमा सहयोग गर्दै आएको छ। यस किसिमको सहयोगले शिक्षा क्षेत्रमा योगदान पुर्याउनुका साथै संस्थागत सामाजिक उत्तरदायित्वलाई व्यवहारमा उतार्न सघाउने विश्वास बैंकले लिएको छ।
सिटिजन्स बैंक इन्टरनेसनल लिमिटेडले ग्रामीण क्षेत्रका सामाजिक संस्थाहरूमार्फत समुदायमा सकारात्मक परिवर्तन ल्याउने उद्देश्यले यस्ता कार्यक्रमहरूलाई प्राथमिकतामा राख्दै आएको सिटिजन बैंकका कर्मचारी परीबेश मिश्रले जानकारी गराएका छन् ।
