क्रान्ति केन्द्र सम्वाददाता
काठमाण्डौ । सशस्त्र प्रहरीका गणेशबहादुर ठाडा मगर अतिरिक्त महानिरीक्षक (एआईजी) पदमा बढुवा भएका छन्।
सोमबार बसेको मन्त्रिपरिषद् बैठकले बढुवा समितिको सिफारिसअनुसार ठाडा मगरलाई एआईजीमा बढुवा गर्ने निर्णय गरेको हो। सशस्त्र प्रहरी बलको नेतृत्वमा एक दूरदृष्टि र निडर कमाण्डरको रूपमा चिनिएका गणेश ठाडा मगर सशस्त्र प्रहरी बल अतिरिक्त महानिरीक्षक एआइजी पदमा बढुवा भएका छन् ।
गत जेठ १५ गते गृह मन्त्रालयले ठाडा मगरको नाम बढुवाका लागि सिफारिस गरेको थियो। बढुवाको प्रतिस्पर्धामा रहेका कमल गिरी लगायत आधा दर्जनभन्दा बढी डीआईजीहरूलाई पछि पार्दै ठाडा मगर एआईजीमा सिफारिस भएका थिए।
शक्तिकेन्द्रहरूबीचको रस्साकस्सीका कारण डेढ महिनासम्म बढुवा सिफारिस रोकिएको थियो। उनको यो बढुवा सशस्त्र प्रहरी संगठनको निष्ठा, अनुशासन र कार्यदक्षताको कदरको स्पष्ट सन्देश पनि हो ।
रिक्त एआईजीका लागि विभिन्न मितिमा सेवा प्रवेश गरेका १० जना नायव महानिरीक्षक (डीआईजी) हरु प्रतिस्पर्धामा थिए । एआईजी प्रतिस्पर्धाका लागि २०५६ मा नेपाल प्रहरीमा निरीक्षकबाट सेवा प्रवेश गरेर पछि सशस्त्रमा स्थानान्तरण भएका क्रमशः कमल गिरी, गणेश ठाडामगर, शम्भु सुवेदी र कुलबहादुर नेम्वाङ छन् । उनीहरु ३ पुस २०७७ मा एसएसपीबाट डीआईजीमा बढुवा भएका थिए।
त्यस्तै २०५२ मा नेपाल प्रहरीमा प्राविधिक नायव निरीक्षक (सइ) बाट सेवा प्रवेश गरी पछि सशस्त्रमा स्थानान्तरण भएका कुमार न्यौपाने र कालीदास धौबजी पनि प्रतिस्पर्धामा थिए । दुवै २२ असार २०७८ मा डीआईजी भएका थिए । यसैगरी २०५४ मा प्रहरीबाटै प्राविधिक सइका रुपमा सेवा प्रवेश गरेका लक्ष्मण सिंह र प्रदीपकुमार पाल पनि एआईजी प्रतिस्पर्धामा छन् । सिंह र पाल २२ चैत २०७८ मा डीआईजी भएका थिए ।यसैगरी सशस्त्र प्रहरीको पहिलो ब्याचका सुरेश श्रेष्ठ र अञ्जनीकुमार पोखरेल पनि एआईजी प्रतिस्पर्धामा छन् । दश जनाको आवेदन परे पनि गिरी र ठाडामगरबीच चर्को प्रतिस्पर्धा देखिएको थियाे ।
डिआइजीहरू कमल गिरी, गणेश ठाडामगर, शम्भु सुवेदी, कुलबहादुर नेम्वाङ, कुमार न्यौपाने, कालीदास धौबजी, लक्ष्मण सिंह, प्रदीपकुमार पाल, सुरेश श्रेष्ठ र अञ्जनीकुमार पोखरेलले बढुवाका लागि आवेदन दिएका हुन्।
सशस्त्र प्रहरी बलमा एक महिनादेखि सीमा सुरक्षा विभाग रिक्त भएको छ।
सशस्त्र प्रहरी अतिरिक्त महानिरीक्षक (एआइजी) चन्द्रप्रकाश गौतमको अनिवार्य अवकाशपछि सो विभाग रिक्त भएको हो।
भारत–पाकिस्तान द्वन्द्वका कारण सीमा क्षेत्रमा कडाई गरेको बेला सीमा सुरक्षाको जिम्मेवारी लिएको सशस्त्र प्रहरी बलमा सीमा सुरक्षा विभाग नै रिक्त भएको एक महिना पुग्न लागेको छ।
