क्रान्ति केन्द्र सम्वाददाता
राजविराज। सप्तरीको राजविराजस्थित सुनचाँदी पसलमा जिल्ला प्रशासन कार्यालय सप्तरी, वाणिज्य आपुर्ति तथा उपभोक्ता संरक्षण कार्यालय, विरगंज र घरेलु तथा साना उद्योग कार्यलय राजविराजको प्रतिनिधिहरूको संयुक्त टोलीले अनुगमन गरेको छ। बुधबार बजार अनुगमन गर्ने खबर पाएपछि सुनचाँदी पसलेहरुले भागाभाग भएको देखिएको छ।
बिहान पसलहरु खुलेपनि टोली आइरहेको सुचना पाए पसलेहरु धमाधम पसल बन्द गरेका थिए । अनुगमन टोली बजार आउँदा अधिकांश पसलहरु बन्द भइसकेको थियो।पसलेहरुमा शिक्षा अभावहुँदा पसल बन्द गरेर भागेको सुन चाँदी व्यवसायी संघ सप्तरीका अध्यक्ष नारायण रंजन बताउँछन्।
‘भाग्नु नपर्ने थियो, उनीहरूमा अनुगमन बारे शिक्षाको आभाव छ त्यसैले भागेका होलान्,’ उनले भने।
टोली अनुगमन गर्दा बखत रंजन उपस्थित भएपनि उनको पसल पनि बन्द नै थियो। अनुगमन टोलीले पनि उनको पसलमा अनुगमन गर्न चासो देखाएन्।
खुलेका केही पसलमा टोलीले अनुगमन गरेपनि अनुगमनमा के के बिषयमा जाँचबुझ गर्ने बिषयमा उनीहरू आफै अन्यौलमा थिए। अनुगमन सुरु गरिसकेपछि टोलीका प्रतिनिधिहरूले अनुगमनमा के के कुरा गर्ने बिषयमा छलफल गरेका थिए। सुन चाँदीको गुणस्तर भन्दा पनि कागजातहरु दुरुस्त बिषयमा अनुगमन गरिएको छ। अनुगमन टोली आइरहेको सुचना पसलेहरुलाई लिक भएकोले उनीहरू भागेको आशंका स्थानीयहरूको छ। यद्यपी टोलीका नेतृत्व गरेका जिल्ला प्रशासन कार्यालय सप्तरीका प्रशासकीय अधिकृत जितेन्द्र कुमार पासवान सुचना लिक भएको कुरा नकार्छन्। उनले टोली आएपछि बन्द गरेको हुनसक्ने बताउँदै अर्को दिन फेरि अनुगमन गर्ने बताए।
