क्रान्ति केन्द्र सम्वाददाता
राजविराज । मधेश प्रदेश सरकारको एक करोडभन्दा बढीको लगानीमा सप्तरीको रुपनी गाउँपालिकामा निर्माण भएको सामूदायिक भवन प्रयोग विहिन बनेको छ।
जिल्लाको क्षेत्र नम्वर ३ (क) का प्रदेश सांसद मो.समिमको संसदीय क्षेत्र पूर्वाधार विकास कार्यक्रमबाट वडा नम्बर ६ दुधैलामा निर्माण गरिएको भवन प्रयोग विहिन बनेको हो।
आर्थिक वर्ष ०७५/०७६ सालमै उक्त सामूदायिक भवन कार्य सुरु गराइएको थियो । सुरुको वर्षमा भवन निर्माणमा ५० लाख रुपैयाँ खर्चिएको थियो। त्यसपछि ०७६/०७७ मा मो.समिमकै संसदीय क्षेत्र पूर्वाधार विकास कार्यक्रमबाट २५ लाख रुपैयाँ लगानी लगाइयो ।
त्यसमा पनि भवन अधुरै रहेको भन्दै आर्थिक वर्ष ०७८/०७९ र ०७९/०८० मा पनि १०–१० लाख रूपैयाँ खर्चियो। यतिको रकम खर्च गरेर भवन तयार भएपनि अहिलेसम्म हस्तान्तरण हुन सकेको छैन् ।
‘यहाँ अन्धाधुन्ध बजेट खर्चियो तर अहिलेसम्म भवन प्रयोगमा आउन सकेको छैन्, जबकी दुई पटकसम्म पेटिङ पनि गरियो, किन र केका लागि बुझ्नै मुस्किल छ।’ स्थानीय कुलानन्द चौधरीले भने।
हस्तान्तरण नहुँदै जिर्ण बन्दै भवन
स्थानीयका अनुसार भवनको काम गुणस्तरहिन भएको छ। भवनको छतमा चिरा परेर चुहिन थालेको छ।’अब त भवनै जिर्ण बन्दै गएको छ । भर्याङमाथिको जस्ता पनि उडेको छ भने छतमा चिरा परेर चुहिन थालेको छ ।’एक स्थानीयले भने।
उक्त भवन वडालाई हस्तान्तरण गर्न अनाकानी गर्दै आएको वडा अध्यक्ष बद्रीनारायण सरदारले बताए । ‘पटक पटक हस्तान्तरण गर्न आग्रह गर्दै आएको छु तर उद्घाटन गर्न मन्त्रीहरुलाई बोलाउनुपर्छ र त्यसका लागि वडालाई खर्च तिर्न भनिरहेका छन’ उनले भने, ‘तर, वडामा पैसै छैन्, कार्यक्रम गर्न पालिकालाई थोरै खर्च मिलाइ दिन आग्रह गरेको छु । त्यहीबाट आयो भने उद्घाटनमा आउनुहुने सांसद र मन्त्रीज्यूहरुका लागि खर्च गरौंला ।’
तर, अहिलेसम्म पालिकाबाट खर्च नपाउँदा कार्यक्रम गर्न नसकेको वडा सरदार बताउँछन् ।
पूर्वाधार विकास कार्यालय सप्तरीका सूचना अधिकारी तपेश्वरकुमार साहले ती भवनबारे थप बुझेर प्रतिक्रिया दिने बताए। ‘उक्त भवन तत्कालिन सिरहास्थितको कार्यालयले निर्माण गराएको थियो, त्यहाँबाट यस जिल्लाका केही तथ्यांकहरु आएको पनि छ तर ती भवनबारे थप बुझ्नैछ’ उनले भने, ‘बुझेर मात्र केही भन्नसक्छु ।’
