क्रान्ति केन्द्र सम्वाददाता
राजविराज।सप्तरीको खडक नगरपालिकाकी पूर्वउपमेयर यास्मिन सुल्तानको गोदामबाट भन्सारछलीको आशंकामा लाखौं रूपैयाँको कपडा बरामद गरिएको प्रकरणमा थप खुलासा भएको छ।एक महिनाअघि सप्तरी प्रहरीले नियन्त्रणमा लिएको कारसहित भारतबाट ल्याउँदै गरिएको अवैध कपडामा पनि उनको सम्बन्ध जोडिएको खुलेको हो।
कात्तिक ११ गते अवैध रूपमा भन्सारछली भारतबाट कारमा ल्याउँदै गरिएको कपडासहित चालकलाई नेपाल प्रहरी सप्तरीको टोलीले बोदेबरसाईन नगरपालिका-३ गौरा टोलबाट नियन्त्रणमा लिएको थियो।एक लाख १३ हजार कपडा र २० लाख कारको मुल्यांकनसहित पक्राउ गरिएको चालक खडकनगरपालिका-८का बिसनपुरका सनाबुल मियाँलाई प्रहरीले राजविराज भन्सार कार्यालय तिलाठीमा कारबाहीको लागि बुझायो।कातिक १२ गते भन्सारलाई बुझाएको उक्त कारसहित मानिसलाई खडक नगरपालिका-७ कल्याणपुरका फिरोज खाँले धरौटी राखेर सोही दिन छुटाएको भन्सार स्रोतले जानकारी दिएको छ।फिरोज खाँ पुर्व उपमेयर सुल्तानको श्रीमान हुन् ।भन्सार स्रोतका अनुसार गाडीवापत १५ लाख २ हजार, समानवापत एक लाख १३ हजार र मान्छे वापत ५० हजार धरौटी राखिएको छ।
पक्राउ परेको उक्त कार खडकनगरपालिका-७ कल्याणपुरस्थित न्यु रहिमसुदिन बस्त्रालयको नाममा रहेको छ।त्यहा रहेको अर्को रहिमन्थुमुदिन बस्त्रालय फिरोज खाँको बुबा रहिममुदिनको रहेको र फिरोज खाँले चलाउँदै आएको हो।
सशस्त्र प्रहरी र भन्सार कर्मचारीको संयुक्त टोलीले गत मंगलबार खडक नगरपालिका-७ स्थित यास्मिनको गोदामबाट १९ लाख बराबरको कपडा बरामद गरेको थियो।भन्सार छली गरिएको सामान रहेको सूचनाका आधारमा छापा मारेर ३८ वटा पोका पोसाक बरामद गरेको थियो।
