क्रान्ति केन्द्र सम्वाददाता
राजविराज।मैथिली साहित्य परिषदले विद्यापति स्मृति पर्व-२०८१ सप्तरीको राजविराजमा तीन दिवसीय कार्यक्रम गरि मनाइ रहेको छ ।
उक्त कार्यक्रमको प्रथम दिन मंगलबार बिहान रक्तसंचार केन्द्र राजविराजमा रक्तदान कार्यक्रम गरिएको छ । कार्यक्रममा नेपाल सरकारका पुर्वमन्त्री उमेश यादवसहित २१ जनाले रक्तदान गरेको परिषदका अध्यक्ष अवधेशकुमार झाले बताए।
रक्तदान गर्नेमा अध्यक्ष झा, जिल्ला प्रहरी कार्यालय सप्तरीका प्रमुख प्रहरी उपरीक्षक ढकेन्द्र खतिवडा समेत रहेका छन्। उक्त कार्यक्रमको संयोजन गरेको मैथिल युवा परिषदका अध्यक्ष अखिलेश झा, सचिव सुनिल चन्दन, परिषदका सचिव संजीव नारायण यादव, उपसचिव ललिता झा, सदस्यहरू राजिव कुमार झा र रवि रायले रक्तदान गरेको उनले बताए ।
त्यस्तै स्थानीय विष्णु यादव, देवेन्द्र यादव, शिवानी सुमन,संजीवकुमार यादव, पवनकुमार यादव,लाल देव चौधरी,राहुल चौधरी, पंकज सरकार, रुपेश झा, समीर मिश्र, पुज्य विसी र जितेन्द्र कुमार झाले रक्तदान गरेका छन्।
मंगलबारै दिउँसो २ बजे मैथिली साहित्य परिषदको भवनमा मैथिल विद्यार्थी परिषद्को संयोजनमा कवि गोष्ठी गरिएको अध्यक्ष झाले जानकारी दिए।
२८ गते दिउँसो १ बजे जिल्ला समन्वय समिति सप्तरीको हलमा विचार गोष्ठी हुने छ । मैथिल पत्रकार परिषदको संयोजनमा हुने यस कार्यक्रममा सरकारी कामकाजको भाषा मैथिल किन होइन् बिषयमा चर्चा हुने आयोजकले जनाएको छ।
त्यस्तै अन्तिम दिन २९ गते बिहान ११ बजे पब्लिक विन्देश्वरी माध्यमिक विद्यालय राजविराजबाट झाँकी प्रदर्शन सुरू हुनेछ । त्यसपछि दिउँसो २ बजेदेखि जिल्ला समन्वय समितिको हलमा श्रद्धाञ्जली सभा तथा परिषदद्वारा स्थापित विभिन्न पुरस्कार वितरण तथा साँझ ५ बजे साँस्कृतिक कार्यक्रम हुने आयोजकले जनाएको छ।
मैथिली साहित्य परिषद राजविराज विं सं २०२६ सालमा स्थापना भइ मैथिली भाषा, साहित्य क्षेत्रमा काम गर्दै आएको छ ।
