क्रान्ति केन्द्र सम्वाददाता
राजविराज । सप्तरीको तिलाठी कोइलाडी गाउँपालिका -१ तिलाठीमा आइतबार राति चोरी भएको छ । चाडपर्वको बेला प्रहरीले कडा गस्ती गरिरहँदा तिलाठीमा भाइटिकाको रात आठ घरमा चोरी भएको हो ।
स्थानीय राजिव झा, रामप्रसाद कामैत, सुरेन्द्र झा , प्रभाष झा र शिवनारायण यादव लगायत आठ घरमा चोरी भएको तिलाठीका वडाध्यक्ष दिनेश्वर मिश्रले बताए ।
उहाँका अनुसार राजिवको घरबाट १५ हजार नगद, सुरेन्द्रको तीन थान मोबाइल र प्रभासको घरबाट लुगाकपडा चोरिएको छ ।
आफ्नो घरबाट १४ तोला चाँदी र ३ तोला सुनको ढिक्का लगिएको रामप्रसाद कामैतले बताए ।
त्यस्तै भवेन्द्र मिश्र र पूजा झाको घरमा पनि चोरीको प्रयास गरिएपनि समान चोर्न नसकिएको उहाँले बताउनुभयो ।
भवेन्द्रको घरबाट साइकल चोरेर भाग्दा स्थानीयले हेरेपछि खेतमा साइकल छाडेर चोर फरार भएको थियो । त्यस्तै खोजेन्द्र झाको घरको ढोका चोरले तोडेपनि चोरी गर्न असफल रहेका थिए ।
