राजु शर्मा
हनुमाननगर । सप्तरीको हनुमाननगर कंकालिनी नगरपालिकाका शिक्षकहरूले तीन महिनादेखि तलब नपाउँदा आन्दोलनमा उत्रेका छन् ।
तलबको माग गर्दै उनीहरुले आइतबार नगरपालिका अगाडि धर्ना दिएका हुन् ।
तीन महिनाको तलब तथा दशैं भत्ता यथासिघ्र पाउनुपर्ने उनीहरूको माग रहेको छ ।
शिक्षकहरू आन्दोलनमा गएपछि त्यहाँका सबै विद्यालयको पठनपाठन ठप्प छ ।
नगरसभा हुन नसकेकोले शिक्षक तथा अन्य कर्मचारीले तलब पाउन सकेको छैन् ।
नगरप्रमुख विरेन्द्र माझीले नगरसभाको लागि छलफल भइरहेको र छिट्टै नगरसभा हुन बताए ।
हनुमाननगरमा २ सय बढी शिक्षकहरू छन । आन्दोलनमै सहभागी शिक्षक जितेन्द्र झाले माग सम्बोधन नभएसम्म आन्दोलन जारी राख्ने बताए ।
‘बिहान १० बजेदेखि ४ बजेसम्म धर्ना हुन्छ, हामी सबै त्यही हाजिरी गर्छौँ ।’ उनले भने ।
यसअघि ज्ञापनपत्र बुझाउँदै समस्या समाधान माग गरेका थिए तर माग सम्बोधन हुन सकेन् ।
