राजु शर्मा
भारदह । पुर्व पश्चिम राजमार्ग राजमार्ग अन्तर्गत सप्तरीको हनुमाननगर कंकालनी नगरपालिका- १ भारदहमा आइतबार वीङ्गरको ठक्करबाट दुईजना गम्भीर घाइते भएका छन् ।
पश्चिमबाट पुर्वतर्फ जाँदै गरेको प्र १-०२-००१ ज ३८६६ नम्बरको वीङ्गरको ठक्करबाट स्थानीय महेश्वर अधिकारीको १ बर्षिय छोरा आदर्श अधिकारी र आमा बर्ष ५० की अनिता अधिकारी गम्भीर घाइते भएका हुन् ।
घाइते दुवैजनाको धरान स्थित विपि कोइराला स्वास्थ्य विज्ञान प्रतिष्ठानमा उपचार भइरहेको तथा ठक्कर दिने वीङ्गर प्रहरी नियन्त्रणमा राखी कारबाही प्रक्रिया अगाडि बढाइएको इलाका प्रहरी कार्यालय कञ्चनपुरले जनाएको छ ।
वीङ्गर चालकको लापरबाहीले दुर्घटना भएको भन्दै आक्रोसित स्थानीयबासी तथा घाइतेका आफन्तहरुले सडक अवरुद्ध गरी विरोध प्रदर्शन गरेका छन् ।
उनीहरूको ज्यान मार्ने उदेश्यले दुर्घटना गराएकोले चालकमाथि ज्यानमार्ने मुद्दा चलाउनुपर्ने, घटना स्थलमा सिडिओ, एसपीसहितका जिम्मेवार सुरक्षा अधिकारीहरुको उपस्थिति हुनुपर्ने, घाइतेहरुलाई क्षतिपूर्तिको व्यवस्था गर्नुपर्ने, कंकालनी मन्दिर क्षेत्र भित्र प्रहरी वीट राख्नुपर्ने, वीङ्गर संघको सिण्डिकेट खारेज गर्नुपर्नेलगायतका माग छ ।
टायर बालेर प्रदर्शनमा उत्रिएका स्थानीयले माग सम्बोधन नभएसम्म अनिश्चितकालीन सडक अबरुद्ध गर्ने अडान लिएका छन् ।
स्थानीयले अबरोध गरेपछि विहानैदेखी लामो तथा छोटो दुरीका सवारीसाधन सडकमा रोकिएको छ ।
