क्रान्ति केन्द्र सम्वाददाता
राजविराज । सप्तरीको हनुमाननगर कंकालीनी नगरपालिका-४ स्थित माध्यमिक विद्यालयमा एक समारोहका बीच शुक्रबार विद्युत पंखा ( सिलिङ फ्यान) हस्तान्तरण गरिएको छ ।
राजविराज टुडे दैनिक पत्रिकाको तर्फबाट १० थान पंखा उक्त पत्रिकाका प्रकाशक शम्भु कुमार झाले विद्यालयका प्रधानाध्यापक गणेशी यादव र व्यवस्थापन समितिका अध्यक्ष रामेश्वर मण्डललाई संयुक्त रुपमा हस्तान्तरण गरेका हुन् ।
अध्यक्ष मण्डलकै अध्यक्षतामा आयोजित कार्यक्रममा बोल्दै प्रमुख अतिथि समेत रहेका झाले गर्मीमा पनि पंखा विना विद्यालयमा पढ्दै आएका बालबालिकाकालागि सानो सहयोग उपलब्ध गराउन पाएको भन्दै खुशी व्यक्त गरे ।
‘यो ठूलो रकमको सहयोग होइन’, उनले भने,’तर पंखा विना सयौं विद्यार्थी गर्मीका कारण पीडित रहनु परेको अवस्थालाई भने नजरअन्दाज गर्न नसकेर पंखा उपलब्ध गराएका हौं।’
उनले विकासका नाममा ठूलो रकम खर्च हुने तर्फ मात्र नसोची जनप्रतिनिधिहरुले यस्ता कुरामा पनि ध्यान पुर्याउनु पर्नेमा जोड दिए ।
प्रधानाध्यापक यादवले पंखा विना गर्मीमा छटपटाईरहेका विद्यार्थीले बारम्बार समस्या बारे ध्यानाकर्षण गराएकोमा यसबारे जनप्रतिनिधिलाई भन्दा पनि कुनै सुनुवाइ नभइरहेको अवस्थामा शुक्रबार पंखा हस्तान्तरण गरीदिएकोमा राजविराज टुडे परिवारलाई धन्यवाद व्यक्त गरे ।
विद्यालयमा कक्षाकोठा, पिउने पानी लगायतको व्यवस्थाकालागि पहल गरिदिन उनले आग्रह गरे ।
