क्रान्ति केन्द्र सम्वाददाता
राजविराज । सप्तरीको राजगढ गाउँपालिकामा भईरहेको भ्रष्टाचार विरोधी आन्दोलनको समाचार संकलनमा पुगेका पत्रकारका एक टोलीलाई मंगलवार गापा अध्यक्ष ओमप्रकाश मण्डलसहितका ब्यक्तिहरुले कार्यकक्षमा थुन्दै आक्रमणको प्रयास गरेकाे घटनाकाे सर्वत्र आलोचना भईरहेको छ ।
राजगढ गाउँपालिकाका अध्यक्ष मण्डल र प्रमुख प्रशासकीय अधिकृत रमेशप्रसाद यादवले तीन जना वडाअध्यक्ष सहितका जनप्रतिनिधिलाई बाईपास गर्दै अपारदर्शीढंगले गाउँसभा गरेको‚ कुनै सूचना उपलब्ध नगराएको र पालिकामा विकास भन्दा भ्रष्टाचार बढेको भन्दै जनप्रतिनिधिसहितका स्थानीयहरु पछिल्लो केही दिनदेखि आन्दोलनरत छन् । सोही विषयको रिपोर्टिंगमा गत मंगलवार पुगेका कान्तिपुरकर्मी आरएन विश्वास र पत्रकारद्धय विद्यानन्द राम तथा नवीनकुमार गुप्तालाई अध्यक्ष मण्डलले अधिकृतको कार्यकक्षमा किन आएको‚ कसको अनुमती लिएको भन्दै आफ्ना समर्थक लगाएर कान्तिपुर टेलिभिजनको बुम माईक खोस्दै दश मिनेट थुनेका थिए ।
उक्त घटनापछि सप्तरीमा पत्रकारिता गर्ने सहज अवस्था नभएको र पत्रकार असुरक्षितसमेत भएका कान्तिपुरकर्मी आरएन विश्वासले बताए । बुधबार पीडित पत्रकाहरूले प्रहरीमा जाहेरी दिएका छन्।
प्रेस मञ्चका महासचिव अवधेशकुमार झाले पत्रकार असुरक्षित भएकाे हुँदा सुरक्षाकाे प्रत्याभूति गराउने राज्यसँग आग्रह गरे । उता नेपाल पत्रकार महासंघले घटनाकाे विराेध गर्दै समाचार संकलनमा राेक लगाउनु प्रेस स्वतन्त्रतामाथि हस्तक्षेप भएकाे ठहर गरेकाे छ । महासंघका महासचिव राेशन पुरीले बिहीबार विज्ञप्ति जारी गर्दै राजगढ गापा कार्यालयमा पत्रकारहरुलाई थुन्ने, माईक खाेस्ने तथा कुटपिटकाे प्रयास गर्ने अध्यक्ष मण्डलसहितका ब्यक्तिहरुमाथि कारबाहीको माग गरेकाे छ ।
महासंघको सप्तरी शाखाले गत बुधवार नै दाेषीहरुलाई कारबाही गर्न जिल्ला प्रहरी कार्यालय सप्तरीमा जाहेरी बुझाईसकेका छन् । यस्तै नेपाल पत्रकार महासंघ सप्तरी, मधेश प्रदेश सरकार मातहतका आमसञ्चार प्राधिकरण, प्रेस मञ्च नेपाल, नेपाल प्रेस युनियन, प्रेस फ्रिडम फाेरम, सप्तरी युथ सहितका संस्थाहरुले पत्रकारमाथि भएको घटनाको विरोध गर्दै कारबाहीको माग गरेका छन् ।
