क्रान्ति केन्द्र सम्वाददाता
राजविराज । नेपाल पत्रकार महासंघ सप्तरी एकपटक पुनः सप्तरी प्रहरीको रवैयाविरूद्ध आन्दोलनमा जान बाध्य भएको छ ।
पत्रकारलाई ज्यान मार्ने धम्की दिएको सन्दर्भमा प्रहरीले अनुसन्धानमा सक्रियता नदेखाएपछि बुधबार पत्रकार महासंघ सप्तरीले आन्दोलनको घोषणा गरेको हो ।
आन्दोलनको कार्यक्रममा बिहीबार(१७ साउन)मा प्रहरीकाे माथिल्लो निकाय जिल्ला प्रशासन कार्यालयमा ज्ञापन पत्र बुझाउने, शुक्रवार(१८ साउन)देखि सप्तरी प्रहरीकाे समाचार बहिष्कार गर्ने र
शुक्रवारैदेखि हातमा कालाे पट्टि बाँधेर सप्तरीका पत्रकारले काम गर्ने घोषणा गरेका छन् ।
यस अवधिमा पनि पत्रकार धम्काउनेमाथि प्रहरीले कारबाही नथालिए दाेश्राे चरणकाे थप सशक्त संघर्षका कार्यक्रम सार्वजनिक गरिने महासंघ बाध्य हुने जानकारी गराएका छन् ।
‘समाचार लेखेकाे निहुँमा नेपाल पत्रकार महासंघ सप्तरीका काेषाध्यक्ष एवं राजविराज दैनिकका पत्रकार नवीनकुमार गुप्तामाथि अभद्र ब्यवहार गर्दै ज्यानमार्ने धम्की दिने महदेवा गाउँपालिकाका अभिषेक मण्डलमाथि कानुन बमोजिम कारबाहीकाे लागि जिल्ला प्रहरी कार्यालय सप्तरीमा महासंघले लिखित पत्राचार गरेकाे सर्वविदितै छ ।’ महासंघ सप्तरीका सचिव राम नारायण विश्वासले जारी गरेको प्रेस विज्ञप्तिमा भनिएको छ, ‘उक्त क्रममा सप्तरीका प्रहरी उपरीक्षक गजुसिद्धी बज्राचार्यले बुधवार(१६ साउन)सम्म कारबाही प्रक्रिया अगाडि बढाउने प्रतिबद्धता गरेपनि त्याे बमाेजिम हुन सकेन ।’
पत्रकार महासंघकाे पहिलाे प्राथमिकता पत्रकारकाे सुरक्षा नै भएकाे र त्यसमा सप्तरी प्रहरीले सक्रियता र गम्भीरता दुवै नदेखाएको हुँदा पहिलो चरणकाे संघर्ष कार्यक्रम घाेषणा गरिएको सचिव विश्ववासले बताए ।
उनले दोषीलाई राजनीति संरक्षणको कारण नियन्त्रणमा नलिएको आशंका समेत व्यक्त गरेका छन् ।
सप्तरी प्रहरीले पत्रकारको सुरक्षामा गम्भीरता नदेखाएको यो पहिलोपटक होइन् । यसअघि पनि राजनीतिक प्रभावमा सप्तरी प्रहरीले पत्रकार धम्काउनेलाई कारबाहीको दायरा ल्याउन आलटाल गरेपछि महासंघलाई आन्दोलनमै उत्रिनु परेको थियो ।
पछिल्लो समय सप्तरी प्रहरी राजनीतिक प्रभावमा दोषीलाई उम्काउने गरेको स्थानीयहरूको आरोप रहेको छ ।
