क्रान्ति केन्द्र सम्वाददाता
राजविराज । सप्तरीको हनुमाननगर कंकालिनी नगरपालिकाका नगर प्रमुख विरेन्द्र माझीले अपाङ्गता भएका ब्यक्तिको लागि राज्यले धेरै क्षेत्रमा सुविधा दिएपनि क्षणिक लाभका कारण अपाङ्गता भएका सबै ब्यक्तिहरु रातो कार्ड नै पाउनुपर्ने माग गर्ने गरेको बताएको छ ।
तिलाठी कोईलाडी गाउँपालिकाद्वारा हनुमाननगर कंकालिनी नगरपालिकामा शुक्रबार आयोजित नगरपालिका स्तरीय अपाङ्गतामैत्री विपद् जोखिम न्युनीकरण तथा ब्यवस्थापन सम्बन्धी एक दिने अभिमुखीकरण कार्यक्रममा बोल्दै नगर प्रमुख माझीले सो कुरा बताएको हो ।
‘अपाङ्गता भएका ब्यक्तिलाई राज्यले धेरै क्षेत्रमा सुविधा दिएको भन्दै लोक सेवा आयोगमा अपाङ्ग कोटा नै निर्धारण गरिएको छ तर सबैलाई मासिक भत्ता आउने रातो र निलो रंगको परिचय पत्र नै चाहिन्छ’ उनले भने ।
युनिसेफको सहयोग तथा हनुमाननगर कंकालिनी नगरपालिकाको समन्वयमा आयोजित सो अभिमुखीकरण कार्यक्रममा नगर प्रमुख माझीले अपाङ्गता भएका ब्यक्ति तथा तिनका परिवारमा सचेतना तथा जानकारीको अभावमा राज्यले दिएको सुविधा उपभोग गर्नबाट वञ्चित हुने गरेको बताए ।
अपाङ्गता भएका ब्यक्ति तथा समाजलाई सचेत गराउनु आवश्यक भएको बताउँदै प्रमुख माझीले वडा स्तरमै जनचेतनामुलक कार्यक्रम सञ्चालन गरिने जानकारी दिए ।
हनुमाननगर कंकालिनी नगरपालिकाका प्रमुख विरेन्द्र माझीको अध्यक्षतामा आयोजित सो अभिमुखीकरण कार्यक्रममा अपाङ्गता राष्ट्रिय निर्देशक समितिका सदस्य सावित्रा घिमिरे र तिलाठी कोईलाडी गाउँपालिकाका विपद् ब्यवस्थापन अधिकृत राजेश कुमार झाले सहजीकरण गरेको थियो ।
हनुमाननगर कंकालिनी नगरपालिकाको विपद् ब्यवस्थापन समिति र अपाङ्गता समन्वय समितिका पदाधिकारी तथा सदस्यहरु तथा बिषयगत शाखाका कर्मचारीहरुको सहभागिता रहेको थियो ।
युनिसेफको सहयोगमा तिलाठी कोईलाडी गाउँपालिकाद्वारा कञ्चनरुप नगरपालिका, सप्तकोशी नगरपालिका, हनुमाननगर कंकालिनी नगरपालिकामा नगरपालिका स्तरीय अपाङ्गतामैत्री विपद् जोखिम न्युनीकरण तथा ब्यवस्थापन सम्बन्धी एक दिने अभिमुखीकरण सम्पन्न भएको र शनिबार तिलाठी कोईलाडी गाउँपालिकामा कार्यक्रम रहेको विपद् ब्यवस्थापन अधिकृत राजेश कुमार झाले जानकारी दिए ।
