क्रान्ति केन्द्र सम्वाददाता
राजविराज । सप्तरी तिलाठी कोइलाडी गाउँपालिकाले वडाहरूबाट योजना संकलन बिनै बजेट ल्याएको छ ।
पालिकाको वडा नं १का अध्यक्ष दिनेश्वर मिश्र, ३का वडाध्यक्ष रमेश कुमार मुखिया, ६का वडाध्यक्ष रोशन सिंह र ८का वडाध्यक्ष सत्यनारायण यादवले सोमबार साँझ संयुक्त प्रेस विज्ञप्ती जारी गर्दै उक्त गाउँसभा फोटो सेशन मात्र रहेको उल्लेख गरेको छ ।
उनी वडाध्यक्षहरूले कुनै वडाबाट योजना संकलन नै नगरि बजेट ल्याउनु गाउँ सभा नभई असारे सभा रहेको बताएका छन् ।
‘तिलाठी कोइलाडी गाउँपालिकाले १० औं गाउँसभा गरेको भन्दै समाजिक संजालमा देखिएको फोटोहरू प्रति हाम्रो गम्भीर ध्यानकर्षण भएको छ । कुनै वडाबाट योजनाहरु पेश नै नभएको अवस्था रहेकोले यो हचुवाको भरमा फोटो सेशन गरेर गरिएको असारे सभा मात्र हो ।’ विज्ञप्तिमा भनिएको छ, ‘यसरी गाउँसभाको नाममा जनतालाई भ्रममा पार्नु सिंगो लोकतन्त्रको उपहास हो । वडाबाट योजना संकलन नै नभएको अवस्थामा गरिएको गाउँसभा कतिको वास्तविक, जनहितकारी र कानुनी रहेको हुनसक्छ ?’
उनीहरूले उक्त गाउँसभा बैधानिक नभएको दाबी गरेका छन् ।
‘यो लोकतन्त्रको अभ्यासलाई कमजोर पार्ने कुकृत्य रहेको हाम्रो ठम्याइ छ । तसर्थ गाउँ सभा भएको भनी फैलाइएको यो भ्रम मात्र हो । यसमा विश्वास नगर्न जनता जनार्दनमा आग्रह गर्दछौँ,’ विज्ञप्तिमा उल्लेख छ ।
तिलाठी कोइलाडी गाउँपालिकाले सोमबार आर्थिक वर्ष २०८१/०८२को ४४ करोड ८७ लाख बजेट बढी प्रस्तुत गरेको हो ।
यस सन्दर्भमा पालिका अध्यक्ष अरूण मण्डलले ४वटा वडाले योजना पेश नगरेको स्विकारेका छन् । उनले भने, ‘गाउँसभा भएको हो, चारवटा वडाबाट योजना आएको छ र चारवटाबाट आएको छैन् ।’
