क्रान्ति केन्द्र सम्वाददाता
राजविराज । मधेश प्रदेशको नयाँ मुख्यमन्त्रीका लागि जनमत पार्टीबाट सतिश कुमार सिंहको नाम सिफारिस भएको छ ।
जनमत पार्टीको बिहिबार बसेको केन्द्रीय सचिवालय बैठकबाट सिंहलाई मुख्यमन्त्रीको उम्मेदवार बनाउने निर्णय गरेको हो ।
यद्यपी जनमत पार्टी भित्रै एक पक्षमा यस निर्णयले असन्तुष्टि देखिएको छ ।
जसपा नेपालका मुख्यमन्त्री सरोज कुमार यादव मंगलबार विश्वासको मत नपाए पछि सोही राति प्रदेश प्रमुख सुमित्रा भण्डारीले नयाँ सरकार गठनको आह्वान गरेकी थिइन ।
नेकपा एमाले, नेकपा माओवादी केन्द्र, जनमत पार्टी, नेकपा एस, नागरिक उन्मुक्ति पार्टी र नेपाल संघीय समाजवादी पार्टीको सहयोगमा जनमत पार्टीले नयाँ मुख्यमन्त्री बनाउन सरकारको दावी पेश गर्नेछ ।
मधेश प्रदेशमा प्रदेशसभा सदस्यको संख्या १ सय ७ छन् भने सरकार बनाउन ५४ साँसद आवश्यक पर्ने छन । तर ती दलहरूसंग ५३ साँसद मात्र छन् । एमाले २४, जनमत १३, माओवादी केन्द्र ९ र नेकपा एस ७ गरी ५३ प्रदेश सभा सदस्य मात्र छन् । ती दलहरूलाई बहुमत पुर्याउन अझै १ जना संसाद आवश्यक पर्छ ।
मन्त्रालय भागबण्डा नमिल्द दाबी पेश ढिलाइ
मन्त्रालय भागबण्डा नमिल्दा मधेशको मुख्यमन्त्रीमा दाबी पेश ढिलाइ भएको छ । नेकपा एमाले, माओवादी र एकीकृत समाजवादी जनमत पार्टीको नेतृत्वमा सरकार बनाउन सहमत भइसकेका छन् ।
मन्त्रालय भागबण्डाका विषयमा बिहीबार बिहान ११ बजेदेखि दलहरुबीच भइरहेको छलफल निष्कर्षमा पुगेको छैन ।
बैठकमा सहभागी एक नेताका अनुसार नेकपा एकीकृत समाजवादीले तीनवटा मन्त्रालयमा दाबी गरेपछि कुरा मिल्न नसकेको हो ।
दलहरुबीच बिहीबार नै मुख्यमन्त्रीमा दाबी पेश गर्ने सहमति छ । बिहीबार रातिसम्म भए पनि मुख्यमन्त्रीमा दाबी पेश गर्ने बताए ।
सत्ता गठबन्धनलाई समर्थन गरेको १-१ सिट रहेको नागरिक उन्मुक्ति पार्टी नेपाल र नेपाल संघीय समाजवादी पार्टीले पनि १-१ वटा मन्त्रालय पाउनु पर्ने दाबी गरिरहेका छन् । दुबै दललाई राज्यमन्त्री दिएर मनाउने प्रयासमा ठूला दलहरु छन् ।
एमाले, जनमत र माओवादी केन्द्रबीच भने भागबन्डा करिब मिलिसकेको छ । मधेशमा मुख्यमन्त्रीबाहेक ११ मन्त्रालय छ । एमाले ४, जनमत, माओवादी केन्द्रले २-२ जना लिने मौखिक सहमति करिब करिब भइसकेको एक सांसदले बताए । एकीकृत समाजवादी भने दुई मन्त्रालयमा चित्त बुझाउन तयार छैन ।
छलफल भइरहेको र बिहीबार नै सहमति हुने एक नेताले जानकारी दिए ।
