क्रान्ति केन्द्र सम्वाददाता
राजविराज । सप्तरीको राजगढ गाउँपालिकाको अध्यक्ष ओमप्रकाश मण्डलले राजगढ गाउँपालिकालाई भ्रष्टाचार रहित बनाउने प्रतिबद्धता गरेका छन् ।
मंगलबार गाउँपालिकामा अख्तियार दुरुपयोग अनुसन्धान आयोगको इटहरी कार्यालयले आयोजना गरेको भ्रष्टाचार नियन्त्रण तथा सुशासन प्रवर्द्धन सम्बन्धि पालिका स्तरीय अन्तरक्रिया कार्यक्रमलाई सम्बोधन गर्दै अध्यक्ष मंडल यस्तो बताएका हुन् ।
उनले आयोगको यस्ता कार्यक्रम पालिकाको लागि प्रभावकारी हुने विश्वास व्यक्त गरेका छन् ।
कोशी प्रदेशको १२ र सप्तरी जिल्ला हेर्ने आयोगको इटहरी कार्यालयमा परेको उजुरीको तथ्याङ्क कार्यक्रममा प्रस्तुत गरिएको थियो । जसमा सप्तरीबाट सबैभन्दा बढी उजुरी परेको जनाइएको थियो ।
आर्थिक वर्ष ०७९/०८० मा सप्तरी बाट ३ सय ५९ वटा उजुरी परेको आयाेगका इटहरी शाखाकाे प्रहरी निरिक्षक सन्तोष कुमार रायले जानकारी दिए ।
त्यस्तै उनले यस आर्थिक बर्षमा राजगढ गाउँपालिकाबाट १४ वटा उजुरी परेको समेत बताए। जसमध्ये ५ वटा फर्छ्याेट भएको र ९ वटा बाँकी रहेको जानकारी दिए ।
आयाेगको इटहरी शाखाकाे डिएसपी खगेन्द्र बहादुर खडकाको अध्यक्षतामा आयोजित कार्यक्रमा प्रमुख अतिथि पालिका अध्यक्ष, विशिष्ट अतिथि उपाध्यक्ष रेणु कुमारी मण्डल र प्रमुख प्रशासकीय अधिकृत रमेश यादव रहेका थिए । अन्तरक्रिया कार्यक्रममा स्थानीय जनप्रतिनिधि, कर्मचारी र सञ्चारकर्मीहरुकाे सहभागीता रहेको थियो ।
