क्रान्ति केन्द्र सम्वाददाता
राजविराज । राष्ट्रिय ट्रमा सेन्टरका प्रमुख डा.रुद्र मरासिनिले आर्थिक अनियमिता गरेको भन्दै अख्तियार दुरुपयोग अनुसन्धान आयोगमा उजुरी परेको छ ।
२०७९ भदौ २१ गते सेन्टरका प्रमुखको जिम्मेवारी सम्हालेका मरासिनिले मोडुलर ओटी बनाउनको लागी भएको टेण्डर पक्रियामा अनियमितता गरेको भन्दै २०८१ जेठ १६ गते अख्तियार दुरुपयोग अनुसन्धान आयोगमा उजुरी परेको हो ।
मरासिनीले मंसिरमा ९ करोड ७८ लाख ४८ हजार ५२ रुपैया २० पैसामा उक्त टेन्डर म्याक्सिम कम्पनीको सुन्दर भुसाललाई दिने निर्णय गरेको उजुरी पत्रमा उल्लेख छ । उक्त कामको लागि ५० लाखमा सेटिङ भएको र सो रकमको जिम्मेवारी स्वास्थ सचिव रोशन पोखरेलले लिएको उजुरीमा भनिएको छ ।
अनियमितता गरेकै कारण मोहन बस्नेत स्वास्थ्यमन्त्री हुँदा डा.मरासिनिको त्यहाँबाट सरुवा गरिएको थियो । तर प्रदिप यादव स्वास्थ्यमन्त्री भएपछि डा. प्रमोद यादवलाई जिम्मेवारीबाट हटाउँदै उनको ठाउँमा जेठ १३ गते मरासिनीलाई पुन: ट्रमा सेन्टरको प्रमुख मेडिकल सुपरिटेन्डेन्टमा सरुवा गरिएको हो । त्यसपछि डा.मरासिनि टेन्डर अनुसार कामकाज नभए पनि भुक्तानी दिन तयारी अवस्थामा रहेको आरोप छ ।
उजुरीमा पेमेन्ट दिनको लागि तयारी अवस्थामा रहेको LC नम्बर( ००७ LC INS २३-०००१) पनि उल्लेख गरिएको छ ।
स्वास्थ्यमन्त्री प्रदिप यादवले अनियमितता गर्नकै लागि पुन: डा.मरासिनिको ट्रमा सेन्टरमा सरुवा गरिएको स्रोतको दाबी छ।
टेन्डर स्पेसिफिकेसन अनुसार हुनुपर्ने काम नभएको,साउण्ड धेरै भएको, वालको मोटोपन मा ४७ mm टेक्निकल स्पेसमा रहेपनि २२ mm मात्र बनाएको, स्पेक्टसमा मा झ्याल भएको तर ओटीमा नभएको, धेरै महङ्गोमा टेण्डर भएको आरोप छ ।
मरासिनिउपर विभिन्न समयमा करारको कर्मचारीहरु नर्सलाई ब्ल्याकमेल गरि यौन शोषण समेत गरेको आरोप छ ।
उनले एमआरआईको टेण्डर पनि सेटिङमा गरि २० करोडको मेसिन ३५ करोडमा खरिद गरेको उजुरीमा भनिएको छ ।
