क्रान्ति केन्द्र सम्वाददाता
राजविराज । लुटपाटको कारण सप्तरीको सप्तकोशी नगरपालिका-१स्थित नेपाल बैंक लिमिटेडको गार्डको हत्या भएको खुलेको छ ।
हत्यामा संलग्न सोही नगरपालिका वडा नं ५ का चन्द्र बहादुर सुवेदीलाई आइतबार जिल्ला प्रहरी कार्यालय सप्तरीले सार्वजनिक गर्दै लुटपाटको कारण हत्या भएको जनाएको छ ।
प्रहरीका अनुसार मधेश प्रदेश र जिल्ला प्रहरी कार्यालय सप्तरीको टोलीले बैंक सिसिटिभी फुटेजको अध्ययनको आधारमा सुवेदीलाई नियन्त्रणमा लिएको हो । चितवन प्रहरीको सहयोगमा उनलाई शनिबार राप्ती नगरपालिका-१ लोथरबाट नियन्त्रणमा लिएको जिल्ला प्रहरी कार्यालय सप्तरीका प्रवक्ता डिएसपी ढुण्डीराज नेउपानेले जानकारी दिए ।
त्यस्तै प्रहरीले घटनामा प्रयोग भएको खुकुरी, ब्लेड, पिलास, डोरी, काठसमेत बरामद गरेको छ ।
सप्तकोशी नगरपालिका- २ घर भएका ५६ वर्षीय पर्शुराम फुयाल बिहिबार बिहान बैंकमा सुतेकै ठाउँमा मृत फेला परेका थिए ।
अबेर गार्डको कोठा नखुलेपछि बैंकका कर्मचारीले ढोका खोलेर हेर्दा उनी मृत अवस्थामा फेला परेका थिए ।
त्यसपछि हत्याको आशंकामा प्रहरीले अनुसन्धान सुरु गरेको थियो ।
