सिरहा । यतिखेर निजी विद्यालयहरू बजारमा च्याउ जसरी उम्रिरहेका छन् । यसरी तीव्र गतिमा पाइलैपिच्छे विद्यालयहरू खुले पनि समाजलाई यसले फाइदाभन्दा हानी गरिरहेको छ । गुणस्तरीय शिक्षा प्रदान गर्नभन्दा व्यवसाय गर्ने सोंचले विद्यालयहरू खुलिरहँदा यसले निजी विद्यालयप्रति पनि अविश्वास पैदा गर्दैछ ।
तर, निजी विद्यालयहरूको भीडमा केही यस्ता विद्यालयहरू पनि छन्, जो उदाहरणीय बनेर ‘ब्राण्ड’को रूपमा स्थापित छन् । यस्तै एउटा ब्राण्ड हो – मिर्चैयाको सगरमाथा उच्च माध्यमिक विद्यालय । सगरमाथा आजको दिनमा यस्तो ब्राण्ड बनेको छ कि शैक्षिक वृत्तमा नेपालमा सिरहाको नाम लिने बित्तिकै सगरमाथाको नाम आउँछ ।
शनिबार विद्यालयले स्वागत तथा बिदाइ कार्यक्रम आयोजना गरेको थियो । उक्त कार्यक्रम स्नातकका विद्यार्थीलाई औपचारिक स्वागत र हालै सम्पन्न कक्षा १२ को परीक्षा दिइसकेका विद्यार्थीको बिदाईका लागि राखिएको थियो । कार्यक्रममा शिक्षा क्षेत्रका विशिष्ट व्यक्तित्वहरू सहभागी थिए ।
सगरमाथामा कक्षा १२ सम्म पढेका र स्नातक पढिरहेका विद्यार्थीहरू क्रमशः मञ्चमा चढेर जब मन्तव्यहरू दिए, उनीहरू जसरी कार्यक्रम सञ्चालन गरे, जसरी आफ्ना कला र प्रतिभा प्रस्तुत गरे, तब तमाम अतिथिहरूलाई दंग तुल्यायो । लाग्थ्यो – काठमाडौंको कुनै ठूलो शिक्षालयमा यो कार्यक्रम अहिले भइरहेको छ ।
एसईई उत्तीर्ण हुनेबित्तिकै विद्यार्थी काठमाडौं हिँडिहाल्ने प्रवृत्तिको बीचमा कक्षा १२ का र स्नातकका विद्यार्थीको जस्तो भीड त्यहाँ देखियो, त्यसले सबैलाई एउटा फरक अनुभव दिलाइरहेको थियो । त्यो के भने गुणस्तरीय शिक्षा दिँदा यतैका विद्यालयमा पनि विद्यार्थीको भीड लाग्ने रहेछ भन्ने हो । यसले सगरमाथा कसरी काठमाडौंको विकल्प बनेको छ भन्ने कुरा दर्शाउँछ ।
कार्यक्रममा सहभागी वक्ताहरूले गुणस्तरीय र प्रभावकारी शिक्षालाई प्राथमिकतामा राखी गरिएको निरन्तरको प्रयत्नले आज सगरमाथाप्रति यस्तो गौरव गर्ने लायक आकर्षण देखिएको बताए । उनीहरूले आगामी दिनमा सगरमाथा झन् बढी गौरवका साथ लिने लायक नाम बन्ने विश्वास व्यक्त गरे ।
२०४६ सालमा स्थापित सगरमाथा अहिले स्नातकसम्म कक्षा सञ्चालन गरिरहेको छ । प्लस टुमा विज्ञान, व्यवस्थापन र शिक्षा संकायमा यहाँ कक्षा सञ्चालन हुँदै आएको छ भने स्नातकमा त्रिभुवन विश्वविद्यालयको सम्बन्धनमा बीबीएस पढाई हुँदै आएको छ ।
सगरमाथा निकट भविष्यमै बीबीए, सीटीइभीटीको डी फर्मा, सिभिल ओभरसियरलगायतका कार्यक्रम पनि सञ्चालन गर्दैछ । विद्यालयले विगतको जस्तै आगामी दिनमा पनि समाज र अभिभावकको साथ पाउने अपेक्षा सञ्चालक प्रदीप तिवारीको छ ।
आफ्नो ठाउँ आफैं बनाउनुपर्छ भन्दै उनले यसै ठाउँमा भइरहेको नेक प्रयत्नलाई यहीँका मान्छेले माया गरे मात्रै विकास र समृद्धि हुने तर्क उनले गरे । ‘आफ्नै ठाउँमा राम्रो र गुणस्तरीय शिक्षा दिइँदैछ भने बाहिर किन जाने ?’, उनले भने, ‘आफ्नो ठाउँको विकासका लागि हामी आफैंले तदारुकता देखाउनुपर्छ, प्रयत्न गर्नेलाई साथ दिनुपर्छ ।’
सगरमाथाले स्मार्ट प्यारेन्ट, स्मार्ट चिल्ड्रेन र स्मार्ट टिचरको अवधारणा पनि अगाडी सारेको छ । यसले अभिभावक विद्यालयको मात्रै भर पर्ने प्रवृत्तिको अन्त्य हुने, विद्यार्थीलाई गम्भीर बनाउने, शिक्षकलाई अझ बढी जवाफदेही बनाउने र यसले समग्रमा शिक्षण सिकाइ प्रक्रिया प्रभावकारी अनि परिणाममुखी बन्ने विश्वास सञ्चालक तिवारीको छ ।
