क्रान्ति केन्द्र सम्वाददाता
राजविराज । तिलाठी कोइलाडी गाउँपालिका स्तरीय बाल क्लब संजालले ६ बुँदे माग राख्दै पालिका अध्यक्षलाई ज्ञापनपत्र बुझाएका छन् ।
पालिकाले बालबालिकाप्रति ध्यान नपुर्याएको भन्दै बुधबार उनीहरूले पालिका अध्यक्ष अरूण कुमार मंडललाई ज्ञापनपत्र बुझाएका छन् ।
‘तिलाठी कोइलाडी गाउँपालिका नेपाल र भारतको सिमाना सगै जोडिएको गाउँपालिका हो। यस गाउँपालिकामा राष्ट्रिय जनगणना २०७८ अनुसार १३,७२२ जना १९ बर्ष मुनिका व्यक्तिहरू रहेका छन्। जून जम्मा जनसंख्याको ४०.७७% हो। यसरी लगभग आधा जनसंख्या भएको व्यक्तिहरू प्रति स्थानीय सरकार पूर्ण रुपमा जिम्मेवार र जवाफदेही हुनु जरूरी छ। तर अझै पनि बालबालिकाहरू प्रति स्थानीय सरकारले त्यती ध्यान पुर्याएको देखिदैन,’ ज्ञापनपत्रमा भनिएको छ, ‘जसकारण विभिन्न किसिमका सामाजिक समस्या एवं कुरीतिहरूले जरो फैलाईरहेको छ। तिलाठी कोइलाडी गाउँपालिकामा दिनानुदिन बालविवाह, बालश्रम, लागुपदार्थ दुव्र्व्यसनी बढ्दै गईरहेको छ। जसलाई न्यूनीकरण गर्न प्रत्येक वडामा बालक्लव गठन भएतापनि अझैसम्म ‘बालक्लब गठन तथा संचालन कार्यविधि’ पारित नभएकोले दर्ता प्रक्रिया अन्योलमा छ ।’
उनीहरूले पालिका प्रमुख समक्ष बालक्लब गठन तथा संचालन कार्यावधि’ शीघ्र पारित गरी कार्यान्वयन गराउन, कुनै पनि बहानामा कोही बालवालिकाहरू जन्मदर्ता प्राप्त गर्नबाट बन्चित नगर्न, बालविवाह न्यूनीकरण गर्न विवाह गर्दा वडाको सिफारिस अनिवार्य चाहिने र बालविवाहमा सहभागी हुने जनप्रतिनिधि एवं कर्मचारीहरूलाई कारवाहीको नियम बनाउन माग गरेको छ ।
त्यस्तै पालिकाभरी रहेका होटल, पसल तथा कलकारखाना बालश्रमिकमुक्त रहेको सुनिश्चित गर्न, प्रत्येक विद्यालयको ३०० मिटर वरपर कुनै पनि किसिमको सुर्तीजन्य, लागुपदार्थ, जाडरक्सी बेच्न नपाउने र बेचिरहेको भए तत्काल बन्द गर्न र १८ वर्षमुनिका बालबालिकालाई सो सामानहरू विक्री गर्न नपाउने गरी पालिकाभित्रका सम्पूर्ण वडा कार्यालय, टोल सुधार समिति, विद्यालय व्यवस्थापन समिति तथा हाटबजार व्यवस्थापन समितिलाई पत्राचार गर्न र वि.सं. २०८७ सम्म नेपाल देशलाई नै वालमैत्री बनाउने लक्ष्य पुरा गर्न प्रत्येक वडाले आ-आफ्नो वडालाई वालमैत्री बनाउन आगामी योजनाहरुमा बालवालिका लक्षित तालिम तथा कार्यक्रमहरू राख्न निर्देशन दिन पालिका अध्यक्ष समक्ष आग्रह गरेको छ ।
