क्रान्ति केन्द्र सम्वाददाता
राजविराज । महादेवा गाउँपालिका-१ चिम्टीमा आगलागी भएको पाँच दिन भएको छ ।तर, उनीहरूको समस्या समाधानमा जिल्ला विपद् व्यवस्थापन समिति र स्थानीय सरकारले अझसम्म खासै तदारुकता देखाएको छैन् ।
शुक्रबार हामी त्यहाँ पुग्दा स्थानीयहरूलाई खानेपानीको लागि कल(टुवेल)देखि शौचालयसम्मको अभाव देखिएको थियो ।
यस गर्मीमा लामो समयसम्म पानी बिनै रह्नुपर्ने र खुल्लामै शौचको बाध्य थियो ।
घर, अन्नपात तथा लत्ताकपडा आगोमा जलिसकेकोले उनीहरूलाई लगाउने लुगादेखि सुत्न सम्ममा समस्या देखिएको थियो । एकै त्रिपाल मुनि सासु ससुरासहित बच्चाहरूलाई लिएर ७ जनासम्म सुतेर रात काट्ने गरेको देखियो ।
भुँईमा सुत्न परेकोले सर्प किरा दंशको डर रहेको उनीहरूलाई हावाले कतिखेर टाउको माथिको त्रिपाल उडाएर लग्ला भने चिन्ताले निन्द्रा आइरहेको थिएन् ।
यहाँसम्मकी मंगलबारै आगोमा जलेका जनावरहरूलाई समेत शुक्रबार साँझसम्म व्यवस्थापन गरिएको थिएन् ।
नेपालको कानुनमा जिल्लामा प्रमुख जिल्ला अधिकारीको नेतृत्वमा जिल्ला विपद् व्यवस्थापन समिति रह्ने व्यवस्था छ । जसले विपदको प्रतिकार्य योजना र विपदको समयमा पीडितलाई सहयोग गर्नुपर्ने हुन्छ ।
‘विपद्को समयमा मृत्यु भएका मानिसको शव तथा जनावरको व्यवस्थापन गर्ने, गराउने, आपत्कालीन अवस्थामा विपद् प्रभावित व्यक्तिहरुको लागि आश्रय गृहको व्यवस्था गर्ने, विपद् प्रभावित क्षेत्रमा खानेपानी, खाद्यान्न, लत्ताकपडा तथा औषधि उपचार जस्ता अत्यावश्यक वस्तुको प्रबन्ध गर्ने, विपद् प्रभावित क्षेत्रमा तत्काल आवश्यक पर्ने अस्थायी भौतिक संरचनाहरूको निर्माण गर्न लगाउने ।’ नेपालको कानुनमा जिल्ला विपद् व्यवस्थापन समितिको काम कर्तब्यमा लेखिएको छ ।
तर यहाँ जिल्ला विपद् व्यवस्थापन समिति र स्थानीय सरकारले औपचारिकता मात्र बहन गरिरहेको देखिएको छ । त्यहाँ यस मध्ये एक काम पनि सही ढंगले गरेको देखिएन् । पालिकाले स्वास्थ्य शिविर संचालन गरेपनि त्यो दिनभरि मात्र रहने गरेको स्थानीयले बताए ।
रातको समयमा कसैलाई स्वास्थ्य समस्या भए त्यहाँसम्म सहजै एम्बुलेन्स पुग्न सक्ने अवस्था समेत नरहेकोमा जिल्ला विपद् व्यवस्थापन समिति र स्थानीय सरकारले २४ घण्टा स्वास्थ्य शिविरको समेत व्यवस्था गरेको छैन् ।
अहिले केही संस्था र व्यक्तिहरुले दिएको राहत सामाग्रीबाट पीडितहरूले दैनिक खाना खाएर दिन बिताइरहेका छन् ।
