क्रान्ति केन्द्र सम्वाददाता
राजविराज । जलश्रोत तथा सिंचाइ विकास डिभिजन कार्यालय राजविराजका प्रमुख कार्यालयमा नभेट्ने गरेका छन् ।
उनी कार्यालय समयमा कार्यालयमा नबसी अन्यत्रै रहने गरेको गुनासो आएको छ । त्यहाँ सेवा लिन धाइरहेको एक जना सेवाग्राहीले प्रमुख नभेट्दा काम हुन नसकेको गुनासो गरे ।
‘१५ दिन देखि लगातार कार्यालय जान्छु तर उहाँ भेट्नु हुन्न, कहाँ हुन्छन्, काम हुन सकेको छैन् ।’
गुनासो पछि बिहिबार क्रान्ति केन्द्रको टोली पनि त्यस कार्यालयमा पुग्दा कार्यालय प्रमुख थिएन् । कार्यालयमा एक जना कार्यालय सहयोगीसहित दुई जना मात्र कर्मचारी रहेका थिए । कार्यालय प्रमुख रमण साहको फोन सम्पर्क पनि नहुने गरेको एकजना सेवाग्राहीले बताए ।
यसबारे साहसँग बुझ्न खोज्दा शुक्रबार दिउँसो समेत उनी कार्यालयमा भेटेनन् र उनको फोन नम्बर ९८५२८…५२बन्द रहेको थियो ।
