क्रान्ति केन्द्र सम्वाददाता
राजविराज । सप्तरीको विष्णुपुर गाउँपालिकाका अध्यक्ष उमेशप्रसाद यादवसहित तीन जना विरुद्ध भ्रष्टाचार मुद्दामा उनीहरूले सफाई पाएका छन् ।
बिशेष अदालतको शुक्रबारको इजलासमा भएको सुनबाईमा उनीहरूलाई सफाई दिइएको छ । बिशेष अदालतका सुचना अधिकारी यज्ञराज रेग्मीले तीनै जनालाई सफाई भेटेको जानकारी दिए ।
सोलार बत्ती जडानलगायतका योजनाको रकम भुक्तानीका क्रममा घुस लिएको आरोपमा ख्तियार दुरुपयोग अनुसन्धान आयोगले उनीसहित पालिकाका लेखापाल टेकनारायण यादव र एमआईएस अपरेटर विरेन्द्र कुमार यादवविरुद्ध भ्रष्टाचार मुद्दा दायर गरेको थियो ।
गत साउन ३१ गते अख्तियारको इटहरी कार्यालयको टोलीले लेखापाल टेकनारायण यादव र एमआईएस अपरेटर विरेन्द्र कुमार यादवलाई सेवाग्राहीबाट घुसबापत २ लाख नगद र ३ लाख रुपैयाँको चेकसहित राजविराजबाट पक्राउ गरेको थियो ।
अनुसन्धानका क्रममा उक्त प्रकरणमा गाउँपालिका अध्यक्ष पनि मिलेमतो देखिएको भन्दै आयोगले उनी तीनै जना उपर विशेष अदालतमा भ्रष्टाचार मुद्दा दायर गरेको थियो ।
