क्रान्ति केन्द्र सम्वाददाता
राजविराज । पुर्वाधार विकास कार्यालय राजविराजका कार्यालय प्रमुखउपर भएको हातपात पछि त्यस कार्यालयका कर्मचारीहरु आन्दोलनमा उत्रेका छन् ।
दोषीउपर कारबाहीको माग गर्दै उनीहरूले कालोपट्टी बाँधेर विरोध प्रदर्शन तथा कार्यालयको सम्पुर्ण कामकाज बन्द गरेका छन् ।
एक विज्ञप्ती जारी गर्दै कर्मचारीहरूले दोषी उपर कारबाही र उक्त घटना पश्चात त्यहाँ काम गर्ने कर्मचारीको सुरक्षाको प्रत्याभुती नभएकोले सुरक्षित वतावरण बनाइदिन सम्बन्धित निकायसँग माग गरेका छन् ।
दोषी उपर कारबाही नभएसम्म आन्दोलन जारी राख्ने उनीहरूको भनाई छ ।
मधेश प्रदेशका निवर्तमान शिक्षा मन्त्री तथा जनमत पार्टीका नेता महेश प्रसाद यादवले आइतबार पुर्वाधार विकास कार्यालय राजविराजका प्रमुख प्रविण प्रताप अधिकारीसँग दुर्व्यवहार गरेको थियो ।
दुई वटा योजनाको चिट्ठी आफुले पठाएको व्यक्तिलाई नदिएको भन्दै निवर्तमान मन्त्री यादवले आफुलाई हातपात नै गरेको कार्यालयका प्रमुख अधिकारीले बताएका थिए ।
त्यसअघि मधेश प्रदेशका सांसद सकिल मियाँले पनि कार्यालयमा पटकपटक टेबुल ठोक्ने तथा गालीगलौज गर्ने काम गरेको विज्ञप्तीमा उल्लेख छ ।
निवर्तमान मन्त्री यादवले हातपातको कुरा अस्विकार गरेका थिए । उनले प्रदेश सरकारको योजनाको चिट्ठी दलाल मार्फत बिक्री वितरण गर्न थालेपछि आफु आवेशमा आएको बताए । उनले हातपात नगरेको, हल्का ठेलेको मात्रै बताएका थिए।
