क्रान्ति केन्द्र सम्वाददाता
राजविराज । सामाजिक विकास इकाइ कार्यालय राजविराजका सब–इन्जिनियर अजयकुमार साफी भनिने अजय रजकविरुद्ध विशेष अदालतमा भ्रष्टाचारसम्बन्धी मुद्दा दायर भएको छ । अख्तियार दुरुपयोग अनुसन्धान आयोगले रजकविरुद्ध शुक्रबार विशेष अदालतमा आरोपपत्र दायर गरेको छ ।
आयोगले भ्रष्टाचार निवारण ऐन, ०५९ को दफा ३ को उपदफा (१) बमोजिमको कसुरमा ७० हजार रुपैयाँ बिगो कायम गरी सोही ऐनको दफा ३ को उपदफा (१) देहाय (ग) बमोजिम कैद सजाय र बिगोबमोजिम जरिवाना सजाय माग गरेको आयोगका प्रवक्ता नरहरि घिमिरले बताए ।
भवन निर्माणसम्बन्धी खाता फुकुवा गर्नका लागि सेवाग्राहीसँग घुस मागेको सूचना पाएपछि अख्तियारको इटहरी कार्यालयबाट खटिएको टोलीले स्टिङ्गङ्ग अपरेशन गरेको थियो । इकाइ कार्यालयमै घुस लिँदै गर्दा उनलाई नियन्त्रणमा लिने क्रममा घुसबापत लिएको नगद १५ हजार रुपैयाँ र ५५ हजार रुपैयाँको चेक फ्याँकेर रजक फरार भएका थिए ।त्यसपछि अख्तियारले नगद र चेक नियन्त्रणमा लिएको थियो ।
