क्रान्ति केन्द्र सम्वाददाता
राजविराज ।राजविराजस्थित गजेन्द्रनारायण सिंह अस्पतालमा क्यान्टिन सेवा सुरू भएको छ ।अस्पताले एक साता अघि क्यान्टिन संचालनमा ल्याएको छ ।क्यान्टिनबाट २४ घण्टे सेवाप्रवाह हुने जनाइएको छ ।
बर्षौंदेखि भवन तयार भएपनि प्रयोगमा आउन नसक्दा कुरूवालाई समस्या खेप्नु परिरहेकोले क्याटिन संचालनमा ल्याएको असपतालका प्रमुख(मेसु) अवधेश मिश्रले जानकारी दिए । ‘बिरामी लिएर आउने कुरूवालाई चिया, नस्ता गर्न पनि समस्या थियो, बाहिरबाट चर्को मुल्य तिरेर खानु परिरहेको थियो,’ उनले भने, ‘तयार रहेको भवनलाई प्रयोगमा ल्याए यसले उनीहरूलाई सहज हुनेछ ।’
उनले यसले गर्दा अस्पताललाई आर्थिक फाइदा पनि भएको जिकिर गरे । मेसु मिश्रले भने, ‘भवन तयार थियो, त्यसलाई प्रयोगमा ल्याउँदा अस्पताललाई भाडा पनि आउनेछ र सबैभन्दा महत्वपुर्ण सेवाग्राहीलाई सहज हुनेछ भनेर सुचारू गरे ।’
उनले यस क्यान्टिनमा बजार भन्दा सस्तो र गुणस्तरीय साम्रगी भेट्ने पनि विश्वास व्यक्त गरे ।
अस्पतालमा क्यान्टिन संचालनमा आउँदा चिया, नास्ता र खानामा सहजता भएको कूरूवाहरूको भनाई छ। ‘पहिला रातिमा स्वच्छ पानी पिउन पनि समस्या हुन्थ्यो, अहिले अबेर राति पनि समस्या हुँदैन्, अब चर्को मुल्य तिरेर बाहिर खाना खानेबाट बच्ने भएको छ,’ एक जना कूरुवाले भनिन्,’नजिककोलाई त घरबाट खाना आइहाल्छ, हामीहरू टाढा बस्नेलाई त अप्ठायरो हुन्थ्यो, अब सहज भएछ ।’
अस्पतालका मेसु मिश्रले क्यान्टिन सुचारू गरि सेवाग्राहीलाई सहज गर्न सकिएकोले यसलाई सफलताको रूपमा लिएको बताए । यद्यपी अहिले पनि थुप्रै कामहरू गर्न बाँकी रहेको उनले स्विकारे । ‘यो सफलता नै हो, तर थुप्रै कामहरू गर्न बाँकी छ, हामी कहाँ जनशक्तीको अभाव छ, जनशक्तीको लागि पनि माग राखेका छौँ,’ उनले भने, ‘नयाँ भवनहरू तयारीको अवस्थामा छ,सेवा प्रवाहलाई थप सहज र गुणस्तरीय बनाउन लागि परेको छौँ, छिट्टै हुने विश्वास छ।’
