न्यायको लागि १० महिनादेखि भौतारिँदै शुशिला

प्रवेश मिश्र

राजविराज । गत जेष्ठमा सप्तरीको राजविराज नगरपालिका–१४ प्रसाहीका १५ बर्षीय रामकुमार मण्डल रुखमा झुण्डिएको ‍अवस्थामा मृत भेटेको थियो ।

त्यसयता रामकुमारको आमा शुशिलादेवी मण्डल आफ्नो छोराको योजनाबद्ध ढंगले हत्या गरिएको भन्दै न्यायको लागि भौतारिँदै आएकी छिन्।यद्यपी घटनाको १० महिना बितिसक्दा समेत उनले न्याय पाउन सकेकी छैनन् ।

एक्लौ छोरालाई गुमाएपछी ४० वर्षीया शुशिला न्यायको लागि जाहेरी लिएर जिल्ला प्रहरी कार्यालय पुगिन्। तर १० दिनसम्म प्रहरी कार्यालय धाउँदा पनि प्रहरीले जाहेरी दर्ता गरेनन् । प्रहरीले जाहेरी दर्ता नगरेपछि उनी बाध्य भएर न्याय खोज्दै जिल्ला सरकारी वकिल कार्यालय पुगिन् ।

गत जेष्ठ २४ गते सरकारी वकिल कार्यालयले आवश्यक कारवाहीका लागि पत्राचार गर्दा पनि प्रहरीले कारबाही प्रक्रिया अगाडी बढाएन । त्यसपछि उनी जाहेरी दर्ताकै लागि अदालत पुगिन् ।परमादेशको आदेश माग गर्दै उनले उच्च अदालत जनकपुर, राजविराज इजलासमा मुद्दा दायर गरिन् ।हाल उक्त मुद्दा कारवाहीयुक्त प्रक्रियामा रहेको जनाइएको छ ।

शुशिलाले आफ्नो ससुरा शिवनारायण मण्डल, जेठानी रीतादेवी मण्डल, सोही वडाका वडाध्यक्ष जगदिश मण्डल, सोही ठाउँका रामदेव मण्डल, मोहन मण्डल, दिपक मण्डल, देवु मण्डल, इनरदेव मण्डल, चनरदेव मण्डल, रघुवीर मण्डल, अजीतकुमार मण्डल र तिलाठी कोइलाडी गाउँपालिका–७ बस्ने कृष्णकुमार मण्डल मिलेर छोराको हत्या गरेको दुखेसो सुनाउछिन् । विगतमा चलिरहेका विभिन्न मुद्दाको रिसीवीकै कारण जेष्ठ ९ गते राति हत्या गरेर आफ्नो छोरालाई रुखमा झुण्डियाइ दिएको शुशिलाको आरोप रहेको छ ।

‘उनीहरुले मिलेर मेरो एक्लो छोरालाई मारिदियो, पटक पटक जिल्ला प्रहरी कार्यालय पुगे, डिएसपी सा’बसँग पनि भेट गरे तर जाहेरी दर्ता गरिदिनुभएन’ आइतबार क्रान्ति केन्द्रसँगको कुराकानीमा दुखेसो पोख्दै उनले भनिन्,, ‘न्यायको लागि चौतर्फी गुहार्दै छु मेरो कुरा कसैले पनि सुनिरहेको छैन्,न्यायको लागि सहयोग गरिदिन आग्रह गर्दछुँ ।’

न्यायको लागि संघर्ष गरिरहँदा उनीहरुले आफुलाई पनि मार्ने धम्की दिएको शुशिलाले सुनाईन् । आरोपीतहरुलाई इकिंत गर्दै उनले भनिन्, ‘असार १९ गते उनीहरु मेरो घरमा आएर जसरी तिम्रो छोरालाई मारेर झुण्डियाए, त्यसरी नै तिमिलाई पनि मारी दिन्छु भन्ने धम्की दियो ।’

उता, जिल्ला प्रहरी कार्यालय सप्तरीका प्रवक्ता डिएसपी ढुण्डिराज नेउपालने यस बिषयमा आफुलाई थाहा नभएको प्रतिक्रिया दिए । उनले भने, ‘मलाई यस बिषयमा थाहा छैन्, म बुझ्छु।’