प्रवेश मिश्र
राजविराज । उपप्रधान एवं गृहमन्त्री नारायणकाजी श्रेष्ठले वर्तमान गठबन्धन र सरकारको आयु कांग्रेसको हातमा रहेको बताएका छन् ।
सप्तरीको खडक नगरपालिकास्थित बिसनपुरमा शनिबार संचारकर्मीसँग कुराकानी गर्दै गृहमन्त्री श्रेष्ठले यस्तो बताएका हुन् ।
वर्तमान गठबन्धन र सरकार कति दिन चल्ने प्रश्नमा उनले भने, ‘यो नेपाली काँग्रेसलाई सोध्नुस्’
गृहमन्त्री श्रेष्ठले सरकार मिटर ब्याज पीडितको समस्या समाधान गर्न गम्भीरता पुर्वक लागिरहेको बताए ।
श्रेष्ठले भने, ‘समस्या समाधान हुन्छ, हामीले छोडेका छैनौ, कानुन बनायौँ, आयोग बनायौँ, आयोगको समय सकिएपछि अहिले प्रहरीमा सबै उजुरी पठाएका छौँ, साढे पाँच हजारभन्दा बढी पीडितले न्याय पाएका छन्।’
उनले सप्तरीमा पनि ५४ जना मिटर ब्याज पीडितहरुले न्याय पाएको बताए ।
सोही समय मिटर ब्याजी रामदेव साहका पीडितहरुले गृहमन्त्री नारायणकाजी श्रेष्ठलाई ज्ञापनपत्र बुझाए ।
उनीहरूले आफुहरु न्यायको लागि सडकदेखि अदालतसम्म पुगेको बताउँदै न्यायको लागि गुहार गरे । उनीहरूले मिटर ब्याज पीडितहरुको छलफलमा भएको समस्याबारे ध्यानाकर्षण गराए ।
अदालतले रामदेव साहसहित ८ जनालाई पक्राउ पुर्जी जारी गरेपनि पक्राउ नगरिएको प्रति गृहमन्त्रीको ध्यानाकर्षण गराए ।
उनीहरूले पटकपटक मिटर ब्याजीलाई पत्र काट्दा उपस्थित नहुने र अदालतमा निषेधाज्ञा दिएर पञ्छिने गरेको समस्या सुनाए ।
उनीहरूले निषेधज्ञा मुद्दा जोडन आफु पीडितहरुलाई २५देखि ५० हजारसम्म खर्च हुने गरेकोले त्यो समस्या समाधान गर्न माग राखे ।
