क्रान्ति केन्द्र सम्वाददाता
राजविराज । सप्तरीको छिन्नमस्ता गाउँपालिका वडा नम्बर २ मोहनपुरमा सोमबार एकै राति दुई ठाउँमा आगलागी हुँदा १५ लाख बराबरको क्षति भएको छ ।
स्थानीय राम नारायण यादवको घरमा राती ८ बजे तिर बिजुली सर्टसर्किट भई आगो सल्किदा उनका २ वटा घर र हरिनारायण यादवको एउटा घर सहित खाद्यान्न, लत्ताकपडा, दुई वटा ब्राखा समेत जलेर नष्ट भएको सोही वडाका वडा अध्यक्ष सिकेन्दर कुमार साहले बताए ।
स्थानीयहरुको सहयोगमा राती ११ बजे तिर आगोलाई नियन्त्रणमा लिएका थिए । राति १ बजेतिर स्थानीय बिजली मण्डलको गोठाला बालेको घुडबाट सल्केको आगोबाट कैलु मण्डल, धनिकलाल मण्डल र बजेश्वर मण्डलको घर जलेर नष्ट भएको छ । आगलागीमा नगद एक लाख, लत्ता कपडा, खर–खाद्यान्न लगायका सामग्री जलेर नष्ट भएको वडा अध्यक्ष साहले बताए । उनले आगलागीमा झण्डै १५ लाखको क्षति भएको आकलन गरिएको बताए ।
