क्रान्ति केन्द्र सम्वाददाता
राजविराज । मधेश प्रदेश सरकारका शिक्षा मन्त्री महेश प्रसाद यादवले सोमबार हुने मधेश कृषि विश्वविद्यालय राजविराजको शिलान्यास कार्यक्रम नगर्न विश्वविद्यालय प्रशासनलाई निर्देशन दिएका छन् ।
आइतबार प्रेस विज्ञप्ति जारी गर्दै उनले कार्यक्रम नरोकेमा कुनै किसिमको अप्रिय घटना घटेमा त्यसको जिम्मेवारी मन्त्रालय नभई विश्वविद्यालयको उपकुलपति र रेजिष्ट्रार हुने बताएका छन् ।
‘सहकुलपति तथा विश्वविद्यालयको सभा (सिनेट) को अध्यक्ष म आफै हुँदा विश्वविद्यालयमा हुने कार्यक्रमको विषयमा केही जानकारी नपाउनु दुर्भाग्य हो। २०८०/१०/०८ गते हुने कार्यक्रम विश्वविद्यालयले सिनेटको अध्यक्षको सहमति वेगर गर्नु विवाद निमत्याउनु हो।’ विज्ञप्तिमा भनिएको छ, ‘तसर्थ, सो कार्यक्रम स्थगित गर्न विश्विवद्यालयको प्रशासनिक विभागलाई निर्देशन दिएको व्यहोरा यसै प्रेस विज्ञप्ती मार्फत जानकारी गराइन्छ। कार्यक्रम नरोकेमा कुनै किसिमको अप्रिय घटना घटेमा त्यसको जिम्मेवारी मन्त्रालय नहुने विश्वविद्यालयको भिसी र रेजिष्ट्रार हुने जानकारी समेत गराउन चाहन्छु ।’
राजविराजस्थित मधेश कृषि विश्वविद्यालयमा जनमत पार्टीका कार्यकर्ताहरुले सात बुँदे माग राख्दै आइतबार तालाबन्दी गरेको छ। सोमबार राजविराज नगरपालिका-१३स्थित विश्वविद्यालयको शिलान्यास कार्यक्रम तय गरिएको छ ।
शिलान्यासमा जसपा अध्यक्ष उपेन्द्र यादवलाई प्रमुख अतिथि बनाउने भएपछि जनमतका कार्यकर्ताहरु विरोधमा उत्रिएका हुन् । जसपा अध्यक्ष यादवलाई प्रमुख अतिथि नमान्ने जनमतका कार्यकर्ताहरुको भनाई छ भने अध्यक्ष यादवलाई प्रमुख अतिथि बनाएर कार्यक्रम गर्ने जसपा कार्यकर्ताहरुको अडान रहेको छ । यसले जिल्लाको सुरक्षा व्यवस्था चुनौती थपिएको छ ।
सुरक्षा व्यवस्थालाई कडा राख्न विश्वविद्यालय राजविराज क्षेत्रमा सशस्त्र तथा नेपाल प्रहरीलाई परिचालन गरिएको छ ।
